أنا من الجرح ياصاحبي اتعافيت

آنه من الجرح يا صاحبي اتعافيت
عبرتني المنية ويومها اتبدل
لـكّطت السنين ولحكت ع الضال
وأحييت المصوفر كبل لا يذبل
تانيت امنياتي الما منعسه تنام
حتى اكدر بسكته من القيود افتل
عفت بيت ابوذيه على العش مكتوب
كلبي بفركة الخلان وجناح
وبديت انحاز للشمات وجناح
صدكـ خليتني بس ريشات وجناح
لكن صفك جنحي لمن ردت ارحل
صفك جنحي لعد غيمة
عفت ذاك الغصن هيمة
عمر ويّاك ادور حل
جبيرة السما وين اسأل
اخاف اشرد وما أندل
إلى أن قررت حسيت عمري الضاع
شفت الطير ثاري من يطير اسهل
أثاري العش عذر للما يعرف يطير
أكول اشبي الشامت مايريد ارحل
حركني الظن مثل لعبة الغميضان
وره حايط الشوك بلوعتي اتختل
جنت الخاطرك تحلف ابخلكي الناس
انازع واليمر ايشوفني امدلل
حكت لاغلاطك بنصين كلبي اعذار
ترفه اتغار منها حياكة المغزل