اكو بيهم

اكو بيهم... عبد الحسين الحلفي



اكو بيهم يرد الروح ملكا ... واكو بيهم غثيث ايطلع الروح

اليغثك دائمن تتلاكه ويا ... ويصير كبال عينك وين متروح

اذا تضحك ابوجه اليشمر ارماح ... ايجوز الي شمرهه ايموته النوح

ايجوز بلايه دم موجود ذباح ... ايجوز اشوف دم بس ماكو مذبوح

لتضل تاكل ابروحك عله الراح ... لانك بس تغص تشرب بل جروح

ايجوز الراح مايتوالم وياك ... او منكم فرد واحد يبقه مسموح

اذن خل روح لاتعتبره باقي ... اذا تعتبره باقي انت لتروح

***********

ضحكتك خلهه تلعب ويه العداء ... بس تلعب دمعتك تخسر الدوس

او اصبر حيل اصبر عل يأذيك ... اذا تصبر الركبه ترجف الموس

بس ابجي اذا شفت الكمر طاح! اوشفت الليل وحده بلا وعي ايدوس


وابجي عل ورد لو شفته سهران ... والفلاح شابع نوم محروس

وبجي لو شفت رجلين ليفوك ... ولطم لو حدر منهه شفت روس



الي فوكك مو شرط صيطر لان فوك ... عمر الفوك لوملحجر ماكان

بقت عل كاع بس تخوف النار ...وصعد ليفوك بس فارغ الدخان

الي فوكك مو شرط سيطر لان فوك ... عمر الفوك لوملحجر ماكان

الجذر ضحه اودفن روحه جوه الكاع ... حته ترتفع ليفوك الاغصان

لاياراس لاتحتقر رجليك ... لان الوحدك مصير انسان

اشلون اتكول مامحتاج واحد ... من تموت هم تحتاج دفان

اوبلابستان مصير انته فلاح ... وذا ماكو فلح مصير بستان



وذا فلاحنه يمص دم لورود ... الورد حقه يضل ايشم فلاليح

وذا عطشان انه وبيدك الماي ! اموت من العطش وعطشت ماصيح

يطيح الوكفك موعيب بس عيب ... تبقه انته عله طولك لمن ايطيح

او مو مشكله شراع ابريح اذا طاح ... بس المشكله شراع انكلب ريح

او موعيب السفن ترجف من الروج ... المصيبه عل سفن تضحك ملاليح

او طبع بل سفن تمشي بكيف سفان ... وذا سفان ماكو بكيفهه اديح

موكلشي حلو بس حلو تلكا ...النهر كلش حلو بس بي تماسيح

مثل السيف بيدك يكتل اعداك ... بيد اعداك يجعل دمك ايسيح

الحبل مكروه من ايشد ركبتك ... بس اشكد حلو يصبح مراجيح

غلط عكازتك تشمرهه عل غير ... هوه الينجرح بس انته لطيح



خل طبعك اصيل اولا يغيروك ... اوخل كلبك مثل لون النوارس

اشلون اتريد يبقه الماي موجود ... ولميت عطش عل ماي حارس

المهره التلكه فارس تمشي كداو ... اوترجع لي وره الماتلكه فارس

اذا شفت المدارس ساده البوب ... ارجع لاطفر عل مدارس

ولاتخسر حجي وتحجي ويه خرسان ...ولا تضحك مع الماعنده واهس

محابس عندك او ماعندك جفوف ... عليمن بعد تنطيهم محابس