اشيعوضني الدمع وىنه الخسرته هواي

شيعوضني الدمع وآنه الخسرته هواي
على رملة أمل كل عمري وشلته
وانه الباكو نهاري ورحت ادوره بليل
والمسودن طبع ميعوف سالفته
على نفس الدرب ذبولي بس الصوف
حتى ارجع واكول ذياب ماكلته
وآنه الماصبر والعطش ماوازاه
دنت نفسه وذبح بالصحره راحلته
كلب ماجنه كلبي جني متبنيه
جرعته التعب ميوم دللته
طفل من ايده اكوده وهو يمشي وياي
وعلى ضحكة كهف للموت نزلته
انقفل باب الصبر كدما ادك عليه
مو خالي كرم بس آنه مللته
بعد ماهد سهم كون الطريده بعيد
مابيهه فخر لوكول وصلته
وشفت عصفور ميت كل جرح مابيه
حرت هذا المنيه شلون واصلته
شلت راسي وشفت بالشجره عش محروك
كلت هذا السبب والحركه كاتلته
ونفس موته متت والجسد لحك الروح
وحسرات الجفن وبدمعي غسلته
وسحب سيفه الزمن هل من منازل صاح
اعزل ماخفت والزمن نازلته
مالحته ابد لكن ترسني جروح
بس عندي المهم ماعفته قاتلته