شباط 8 2015

قصيدة مساجله مع الشاعر حسين الساعدي - حسين الساعدي و محمد المعمار

مساجله مع الشاعر حسين الساعدي
حسين الساعدي و محمد المعمار

من الارشيف مساجلتي بالقصيدة مع الرائع الشاعر حسين الساعدي
هذه المساجله الارتجاليه والمباشره التي تمت أحداثها في اقل من ساعتين التي تطاحنت بها سيوف الشعر وتطاعنت رماح الحرب بين الشاعر
حسين الساعدي )
و
(محمد المعمار)

محمد المعمار
تورطنه وحجينه عيدك يكون
ياعيد التعيده ويه المساجين
يدك الباب جان ايريد معجون
واترسله شليله والمعاجين
تُـمُر من يمه هسه وما يسلمون
بضافيره يحس اشوية اطحين
تاج العافية مؤ ترس البطون
اقنعي يانفس حتى تشبعين
إذا صار النفاق يكون بالعون
يعني الوجه صار اليوم وجهين
دنيه وآخره نتحاسب اشلون
اذا ثكلت علينه بالموازين
واللكمه الحرام ابين السنون
تِگَضيك بفگر عايش وألم دين
مو. شرط الفرح عد اليغنون
ضرب العود بيه نتعلم ونين
ولا شرط الغني وشما يملكون
مريض النفس ما يشفا بملاين
جرح الموس هان وكلشي اليهون
لاكن التِجِـرحك كلمة الشين
يِـذِرون ويطشون ويلمون
يحسدون بكره حتى المحبين
تضل بس بوعدهم. ما يوفون
لا تسال حكيم اسال امجربين
اذا حتى بخيالي طگن جنون
صرت شعره ويجروها المجانين
اذا اطرش بنادم واعمه العيون
ما يندل طريقه ويسمع منين
زين اليدري يدري المادره شلون
يو كافي يروحي شگد تلحين
///////////////////
الشاعر حسين الساعدي
تاج العافيه ومقتنعه العيون
أفضل من ثمر كل البساتين
والطماع ميهمه اشيكولون!
ما يقتنع لو كض الملايين
وأنه اشرحلك ولو تعرف اشلون
بشوية تراب وتمتلي العين
الفقير اويه الغني باجر يروحون
أول تالي كلنه انصير ميتين
لكن والحساب ايفرزن اللون!
كلمن يستحق ماسوه بعدين
والباك الايتام اهناك مديون
ويعرف بلمصير ايصير لاوين!
جم واحد ابواحد هسه مدفون
ويتمنه ويرد للدنيا بالزين
ويتمنه ابحياته جان مجنون
لو ما حاسبو. يمه المجانين
الساعدي وتحياتي الى كل الاهل
//////////////
حبيبي اخ حسين سلامك وصل يروحي
محمد المعمار
احبك مو لان جيف انته مزيون
كرهتك مو لان اطباعك الشين
عرفت اترد علي يحسين من دون
تدك بابي اتعرفني منل المعزبين
وصل خويه سلامك نحفض انصون
سلامك من وصل. ياگرت العين
الك نكتب تحيه بكل الفنون
والك من الشعر نطبع دواوين
/////////////////////
الشاعر حسين الساعدي
امعزب والنعم منك يمفتون
مفتون ابفنونك للمحبين
خل نكتب شعر وانفرح الكون
خل نكتب على كل الميادين
عطشانه تراها اليوم العيون
شبعها شعر بأجمل عناويين
خلي الذوق كلتهم يصفكون
انته محمد وسجالك حسين
كدامك بحر تلكاني ممنون
ما تعطش واقدملك دواووين
ااالساعدي
///////////////////
محمد المعمار
شما وفيك اضلن الك مديون
يلكلك طبع شيخ الدواوين
شحجيلك يخويه الما يمرون
موش عزاز جانولي بمعزتين
انا البلسدر جانو يگعدون
صفت حسره عليه مرافك البين
لا سالو عليه ولا ينشدون
جني ولا كلت لا غزر الزين
ماتو خويه راحو والله بالعون
نفضت شليلي منهم والردانين
يشرفني ارد عليك يا تاج
//////////////////
الشاعر حسين الساعدي
شكرا لأطرائك الجميل الذي اتمنى ان استحقه
الكاغد لو لعب. بالنار مجنون
وانته العاقل اربات الدواوين
يمك نعتني والموزمه اتهون
والدله فقيره ابلا فناجين!
سلفنه ينثلم. ويصير مطعون
كون اويه المنيه اتغمض العين
يابيرغ يلوك اويه اليهوسون
ياهيبه وجمع كل المضامين
حسين الساعدي للزين ممنون
وانته الزين تربات الميامين
يصح واحد لجن يسواله مليون
ويصح مليون مايسوون فلسين
االساعدي
وومنون منك ياشجاع لأنك طلعت مني بهل ساعه اهواي كتابات
//////////////////////
محمد المعمار
عاد ابشر بالجواب
اطلعهن وخليهم يسمعون
وآراويهم كتبنه وبالعناوين
واخليهم لبو عليوي يدنكون
عبن ماكدرو يكتبون سطرين
يلكتلي عليهم ما. يسومون
لا دينار لا درهم وفلسين
انا منل صغر جا بس يبيعون
يبيع ويمسح بايده الحياطين
جنت بيها المعلم. واليدرسون
صرت طالب واسمعهم معلمين
تعال وانه الك شفاي
/////////////////////
الشاعر حسين الساعدي
حياك الله يارائع واجمل تحيه مني الك
أنه افتخر وبكل اليكتبون
واليتساجل ارسله رياحين
ماردنه تحيه إمن اليصفكون
ردنه إمن الضماير كلمة الزين
لو صار الشعر بيد اليلعبون
اكتب لا تخلي الشور بعدين
عطشانه المنصه وفاكده اللون
رادت مثل كاظم تصنع اثنين
وشجم شاعر الباقين بالكون
والباقين مثلي اهواي ميتين
االساعدي
///////////////////
محمد المعمار
يلساعدي انته عربيد القصايد ولولاك لما ارتقي الى هذه المكانه العاليه والقدرة على مساجلتك
هوايه اشكال صعدت جي يبوكون
بيها الضال مدفون. الدفنتين
حسافه علشعر والبيه يشعرون
اذا ما. ينذكر عباس وحسين
ركبو علمنايه بيوم الضعون
هزوا كربلا بالطف. مجبلين
راحو بيها جان البيهم الكون
يسجد ليهم ويركع الكونين
ساعد كلب زينب من يحدرون
سبيه ويه الضعن لبن اللعينين
اللهم صلي على محمد وال محمد
محمد المعمار
///////////////////////
الشاعر حسين الساعدي
احسنت يا رائع ختمه رائعه لال البيت عليهم السلام بميزان حسناتك
والشاعر يكون ابشعره مدفون
إذا ما فكر ويكتب للحسين
لازم بلكلام. اتبجي العيون
ولطف كربله تكتب دواوين
وتخايل ابو السجاد مطعون
وعباس الشهم ماعنده جفين
وتخايل ابزينب تنسبي اشلون
وبأيد ال اميه ودمعت العين
وتخايل علي السجاد مسجون
ومجتف يجروه بلدرابين!!
وتخايل يتامه الما يسكتون
عطشانين والوليان ميتين
ياشاعر يغلس هذا مديون
وبيوم القيامه ايفرزن الدين
االساعدي
شكرا لروعتك اخي محمد المعمار كتبت ودعوتنا للكتابه وكتبنا وكنت سبب رائع بكتابة هذه الروائع
تمت ببركة محمد وال محمد
إضافة قصيدة