شباط 20 2015

قصيدة اسف مديت ايدي لبعض الاصحاب - حمزة الحلفي

اسف مديت ايدي لبعض الاصحاب
حمزة الحلفي

اسف مديت ايدي لبعض الاصحاب
ردت عون النفس مو عون الفلوس

الحمد لله بعدني بأحسن الحال
وبعد خيري يتبده ويترس الطوس

صحيح انه طحت بس طيحة جبال
طحت دايس انه ما طحت مديوس

حلاة المر يصير براحة البااااااال
ومرار الحلو يصفه بطخة الروس

تلاوه الريح ويه شراعي ما مال
وعلى چفوفي الونه دنك يبوس

خذتها مزامط ومو جلمه تنگال
وانه زماطي ثبت للعالم دروس

رغم گصري زدت بالموزم اميال
ولبست من المكابر احلى ملبوس

ذوبت الصخر حد ما صفه وسال
وگصيت الحديد بشفرة الموس

خلك عندي يعادل خلك رحال
وصبر عندي يساوي صبر محبوس

انه ثابت والگلب شديته بحبال
وربطته ويه القميص بفرد دنبوس

رطب وتذوب روحي بهوى الموال
واضل اسهر عمر بس كاسي متروس

بعدني بروح خضره وعمري ما حال
وبعد وردي ندي وبالروح مغروس

صحيح انه نهر بس مايي شلال
حفر روحه بديه ما حفرته الفوس
إضافة قصيدة