المنتوج الوطني العراقي الى اين..؟!
الله بالخير
انتهى لقاء الصدفهمن كم يوم صادفت صديق عزيز جدا واني ماشي بأحد الشوارع
صديقي العزيز هذا ما ملتقي فيه من فتره طويله
وبعد الهلا والمرحبا وال شلونكم وشلون صحتكم
_يابه وين تشتغل هسه
فجاوبني صديقي
بالشركه العامه للزيوت النباتيه
_أها يمكن ترحون للدوام تحسبون كاشي وترجعون الله يساعدكم ؟،ممل الدوام بدون عمل!
فاعترض صديقي
ليش بدون عمل عدنا انتاج!
_والله؟!
_بلا ما اتعبك باجر امر عليك للبيت واشوفك انتاجنا شلونه!
ولمه اجه باجر
اندك الباب الظهر واجه صديقي الورده شايل بيده كيس مملوء بعلب مختلفه وكال هذا انتاجنه
عود اندعيلي
وراح
لمه فتحت الكيس
لكيت الاتي
قاصر(كلور) ،زاهي ،معجون اسنان ،شامبو،صابون
طبعا الي اعرفه ان استخدامهم بالبيت زاهي فيري ومعجون اسنان سنسوداين وصابون ديتول وغيرها من المنتوجات والمنظفات (التوب)
اهملنا الهديه القيمه الي جابها صديقي وضمت (حجيتنا)الكيس ومحتوياته جوه (السنك)=(مغسله الصحون)
وبيوم اكشر وبساعه ظهريه حمره جيت اغسل تايرات السياره واكتشفت بان الزاهي الحبوب (فيري) خلصان
وبان (العطار) الي يمنه معزل
شلون شغله وحكمت الا هسه اغسل التايرات
_يابه حجيه متكوليلي وين زاهي(الزيوت النباتيه)
_جوه السنك
ورحت جبت بطل الزاهي واني ما مقتنع راح (ينزل مستوى تايراتي وتنغسل بماركه ما معروفه)لا وشنو
صنع في العراق!
حطيت قطره(تره الموضوع مو دعايه ابد)تفاجأت بالرغوه
واذا الزاهي سمط ابو ابو فيري بالجوده مالته
ما صدكت..
كمت جمعت (معجون الاسنان والزاهي والشامبو والقاصر والصابون)الي نستخدمهم بالبيت وضميتهم بنفس الكيس
وفرضت عليهم الا تجربون (المنتوجات العراقيه) الي اهداها النه صديقي
بعد يومين البيت كله متفاجأ
والحجيه تترحم على روح ابوه وامه لصديقي الورده الي جاب هل هديه التحفه!
اتذكر من قبل 8 سنين وأكثر ان المنتوج الوحيدللملابس الشتائيه الي كانت امي تشتريه النه ماركه(ولدي)
وهذي ماركه معروفه للألبسه الشتويه لمصنع الموصل ولمه كبرنا شويه صارت ماركه (البسه النجف) هي الملبوس الوحيد شتاءا
اما الجواريب الشتويه فكانت من ماركه (الكوت)لمعمل نسج الكوت
البسه وجواريب ضاقت مرّ الحصار وماكانت (تطلع تقاعد)الا بعد فتره طويله وبعمرها ما صاحت اخ راسي!
ّ
هذا الامر نفسه ينطبق على صناعه الطابوق والاشتايكر والكاشي والاسمنت العراقي
الي انلغى دوره بشكل عجيب ونهمل كانه طفل لقيط وحل محله الاشتايكر الايراني الي كسا (ولله الحمد كل ارصفتنا وشوارعنا) برغم انه بعد كم يوم من الرصف يتفطر
وغيره وغيره
من معامل قصب السكر ومطاحن الحبوب الي كانت مغطيه احتياج البلد سنوات الحصار والسواد بدون الاحتياج للمنتوج المستورد الا قليلا
وكل ما اتذكر جكاير سومر الاسود اتحسر على الماركات الي حتى ريحتها متعفنه ويدخنها العراقيين هسه
برغم ان سومر كان يُصدر للدول العربيه وعليه سحب وطلب عالي (اعرف التدخين مسبب رئيسي لسرطان الرئه والقصبات ومضر بالصحه _لاتعترضون يعني بس داسولف الكم)
اما منتوج حلويات بسكولاته ومنتوج نحله وحلويات (الخاصكي)و(نعوش) البغداديه الشهيره
فيروح الها الف فدوه الانتاج التركي والبقلاوه السوريه المستورده
ومعامل الخشب المحليه العراقيه الي كانت تكبس نشاره الخشب ويه الكارتون وتنتج احلى غرف نوم للعرسان واثاث بيت كامل من مواد خام بسيطه
وغيرها وغيرها
ااااااااااااااااااااااااا ااااااااه
وحسره طويله وونه
اي اريد افتهم
بشنو احسن الزيوت النباتيه السعوديه حتى (انّفك) كل منتوجاتها من الصابون والشامبو ومعجون الاسنان والكلور والقاصر واحنه عدنا زيوت نباتيه منتوجها مذهل ما نعرف اصلا عدها انتاج
وبشنو احسن المنسوجات التركيه والسوريه حتى يعزل بسببها معمل ولدي ومعمل البسه النجف ومنسوجات الكوت
وبشنو احسن صناعه الاسمنت والطابوق والاشتاير والكاشي الايراني حتى نستورد منها ومعاملنه منتوجها باقي لازم باب المعمل يتاني احد يحن ويشتريه!
وبشنو أحسن الحلويات التركيه والبقلاوه السوريه الي بلا طعم حتى تترس علبها بيوتنا واحنه بلد (من السما)الي كل العالم يحسدنا على نعمه وجوده عدنا وتفردنا بيه
وبشنو احسن الاخشاب الماليزيه (المطركعه) حتى محد يكلب نجاجيرنا وتوكف نجاره الخشب عدنا
وبشنو وبشنو وبشنو
مو كافي وبس عاد!
مو كلنا ننادي بحب العراق
شلون نثبت حبنا اله والصناعه العراقيه الي هي عماد اقتصاد البلد راكنيها على الرف ونتبجح بأستخدام المنتوجات الي جايه من خلف الحدود مثل سياسيين هل وكت
مو قلوبنا ورمت
شوكت نصحه على انفسنا ونعرف ان حب العراق مو بس شعارات رنانه!
اعتذر طولت عليكم
وفي امان العراق وحفظه
الموضوع بقلم اخي
رد مع اقتباس
