كابوس

كابوس
وحدك مثل اي گمر وحده
وحدك مثل اي ميت تقشمر بلحده
ترسم طير عل الحايط
تحطله جناح
الحلم وسط السجن مفتاح
تصدله شوية وتغرد
تصفگ للرسم والصوت
تتلفت اكو منك خيال تگله خايب شوف
بالظلمة الخيال يموت… ولك وحدك
تنش حلمك… تهز الحايط… تصرخ… كششش ، آااااااع ، طيرك ما يطير تأيس… بعينك ثگيل المزن يتبده
السگف ينزل عليك يلامس الگاع
تتلفلف بروحك مثل سر ابيوت وجفوفك تحت راسك مخده
القفل يحلف بداعة قسمته يضيعك
وحدك… لا حمامة تنگر الباب ولا شباج سولف وي اصابيعك
يا ولك وحدك