اله الغرام

​
  
    صفوا فوگ عينك كل رمش سياف
    لا تفتح عليه اعيون متسلحه
    ولا تجبل عليه ابليلك المجنون
    چتفك مايشيله اوينهدم صبحه
    لا ترفع احجاجك خاف اطيح اعليك
    والهم كلشي بيك واكرط الملحه
    لا تتنهد اگبالي اولاتهز اچتاف
    اجور اعله الخواصر وادگ كل صفحه
    بيدك روحي صارت وانه ارافس بيك
    يارب الغرام امروتك تصحه
    غفله وهاج بحرك وانه مو ملاح
    والدنيه اعله غفله وصفنت ابلمحه
    جفل كلشي اعله وجه الگاع وانه ابليل
   لو بين اثر روجك يجي يمسح
    خدر كلشي وصفت والريح بينه اتدور
    تصرخ واليجابل يوگع ابصرحه
    دخيلك يااله الشوگ طيرك مات
    مو وكت القيامه وتكتل الفرحه
    ياطوفان نوح وبلع كل سفان
    كل روجه بامام ورايته ابرمحه
    وانت بلايه ساحل وانه طير افياي
    لا وكر عليك ولا يچل جنحه
    كل روجه اعله حوت ويونس ايناديك
    ظلمة ليل شوگك ماشفت صبحه
    كل روجه اعله صدرك تبلع الملهوف
    بعيونك تموت وتجفل الوكحه
    سكرني الغرام اوسكر بيه الشوگ
    وافترت علیه ودارت الرحه
    صليت اعله حلگك عمري كله الفات
    سبحت اعله عينك والرمش سبحه
    حجيت اعله صدرك والحجر مفتول
    مو بچفوفي امسحه شفتي اتمسحه
    لو تغسل ذنوبي وامشي بين الناس
    لو يتعرى گلبي وشوگك ايفضحه
    ارحم عاشگ وكل ذنبه حبك صار
    لو جنتك يطب لو نارك اتفضحه