قصيدة ( حلم مبيوگ ) لشهداء العراق وبالأخص تفجيرات الكرادة

اي واحلامنا الماتت سراب بليـل
انسرگ ريح الورد وانلجم جم عطار
من هب ريح ما يعرف شنو الانسان
طفّى شموع منها الگمر چان يغار
منجل والضمير متيهه من كل صوب
واعمى وما يميز شوج لو ازهار
چم خيمة بوطنه الصفت بس قماش
چم بيت الصفت حيطانه بس تذكار
شچم شوغة حسافة بناي فاگد جيل
بيهم دنگت هامات ناس كبار
شكم عين ام بقت تربى بضلع مكسور
بلكي يجيها هدهد شايل الها اخبار
بلجن شمة العطاب بيها ارتاح
لو احصل عظم من ابني چان شصار
انهدم حيل الخشب شبان بيه تنشال
بترافتهم حرام الميل اذا يندار
واطفال المدارس لفهم التفجير
على هيئة ورود وسنبلات گصار
شذنب عيونه الرادت تكحل الروح
لو شافت هواها بكشخة الفخار
جواد داغر الساعدي ٣-٧-٢٠١٦