يربي أرجوك ساعد عبدك بهاي

اكو زلمه اسمه جبار هذا جبار يعيش بمنطقه ريفيه يعني قريه وهوه حاط بالايجار والمشكله اهل المنطقه كلهم حقراء ويكرهون جبار .. جبار عنده اولاد ثلاثه وأمهم متوفيه ابنه الچبير مخبل واخوانه الزغر منه بعدهم كلش زغار .... فهذا جبار يشتغل عامل وبالگوه مدبر المعيشه وفلوس الاجار فـ يوم من الأيام سمع جبار صوت صياح فطلع بره وإذا بيه يشوف بيت جيرانهم يحترگ وبداخل البيت أطفال محد يتجرئ يطلعهم فـ جبار شالته الغيره وچيت بنص النار وطلع الأطفال .. ورجع للبيت متأذي كلش من الحروق وحالته حاله .
وبعد مرور ايام محد وصل جبار ولا واحد سئل عليه وصلت بيه الجروح الى حاله خطيرة قد يموت على اثرها..
فـ جبار من گد مامهموم دعى الله سبحانه وتعالى ان يساعده ...
فـ كان دعائه على شكل قصيده ... فـ گال

يربي أرجوك ساعد عبدك بهاي
دريچ وعگب عينه تغوبر الدار
منو راح بغيابه يغسل الهدوم
وياهو اليشتغل ويلم الايجار
الٰهي انته الكريم واكرم الكون
شلون يزود بيك الكرم جبار
عبدك سمع صوت وراح فزاع
بنص يهود هوه وناس كفار
وشاف أطفال تبچي ابيت مهيوم
وطب وجابهم ماهمته النار
ورد للبيت رغم جروحه مرتاح
لأن سوه العليه وساعد الجار
وأريدك يا الٰهي تعينّي بهاي
شوصيمن عليمن والله محتار
چبير البيت تدري بعقله مو زين
واخوانه يتامى وكلش ازغار
وبقت يمك يربي وتعرف الحال
اذا ما ساعدتنا انصير تذكار
اذا ما ساعدتنا انصير تذكار