آذار 23 2017

قصيدة فزعة جنوبي - الشاعر المبدع جواد داغر الساعدي

فزعة جنوبي
الشاعر المبدع جواد داغر الساعدي

احد الجنود الابطال بعد نزوله من الجبهات المقدسة وعودته الى البيت
تستقبله والدته وهي تقول : إنبئني
فيجبها وهو يقول :

افزعت فزعة جنوبي وبيرغي انشال
وتلگيت الهلا بحلگ الشواجير
وفرضت السيطرة على الساتر وصاح
هلا بترباتها المن ينّخي يغير
الغيرة بروحي ردت روح شعلان
وعلى روس العدة انهدت مگاوير
النسر الشايله ما ضَل ع الچتاف
مشى وي الدگن اوكار الخنازير
انا مطلع الشمس غصبن على الليل
وانه القافلة الكشفت هندس البير
سرفنت الظلام بضوه الفانوص
وللمحزن خذت ضحكة عصافير
شلت راسي وشفت واحدهم غراب
ورماد افعاله وي دخانها يطير
جروا توبة آذنهم لمن جريت
سرگيها وصفوا مثل المسامير
شما يكثر حطبهم تشتهي النار
تاكل واللهب فزعة تنانير
انا حافر قلم كل خطوة نيشان
ونيتي وي الحرب مثل الطباشير
يا هيبة نخلتي اموته چم فاس ؟
وشبعت مِن سعفها شگد تنانير
دلة بمدة ايدي اروي الفناجين
ومن خلگي أشبعت خلگ النواعير
مو كل خيط يفهم مغزى الفتوگ
المو صايود ثق ما يرهب الطير
وصلة گاعي جنة مكحلة بحسين
يا ابليس يدخل بيها ويجير

الشاعر جواد داغر الساعدي / البصرة
إضافة قصيدة