قصيدة أيام

هي :
عشرة أيام مرن وانت ماجيت
تعال الحكلي كلبي من الهجر طاك
تره الفركه حبيبي تصير من يوم
ويوم يجرله يوم يصير الفراك
أكول اليوم ، باجر .. بلكت اتعود
عفية اشخلك عندك لسه ماضاك
جبتها وياك سجة وريل تعبان
خلص عمري اعله مودك امشي ع الراك

هو :
وانا .. أنا بناري احترك وشيحمل النار
ماتطفى وحياتج نار الأشواك
وأنا بعيني مطر ما شالته غيوم
وكلبي حمامة امشبكة شباك

هي :
تعال الصبر خلص والحجي هواي
أخاف احجي ويه روحي وحجيي ينباك
جنت تشتاكلي بكل لحظة يهواي
أشو مرن أيام اشوكت تشتاك

هو :
واضح من كلامج انا مامشتاك
هاي اظنون كلها ومو صحيح الظن
باقي وياي رسمج بالعيون يبات
وسوالف محبتج مني ما يرحن
انتي أول حبيبة العلمتني الشوك
وعلى طرواج هاي عيوني من يغفن
مو قصدي الفراك من ابتعد والله
بس هن الظروف وياي مايصفن

هي :
بظروفك تعتذرلي وآني بيه نار
صرت وين الليالي البيه ميرحمن
تدري بشوفتك مايبقى هم بالروح
وثكال الهموم بجيتك يسهلن
عطشانة الصبر شيسوي للعطشان
سواجي الصبر كلهن بيه ميرون

هو :
زين اشلون لو أبعد عليج اشهور
ذني أيام عشرة وصبرج اتفرهد
صحيح آنه أحبج بس ظروفي اتريد
وصدكيني الظروف وياي تتعمد

هي :
بس آني بشر والكلب حفنة اهموم
ونار البيه كبرى وماأظن تبرد
أجيها بصراحة وآني ماشك بيك
مرات الظنون اتهزني يمحمد