نيسان 21 2017

قصيدة ياشيعتي فوك الجسر - الشاعر حسين الساعدي

ياشيعتي فوك الجسر
الشاعر حسين الساعدي

(المستهل)
ياشيعتي فوك الجسر_هالساعه تلكوني
مسجون وبسم الغدر-ومغمض اعيوني
موعدنه ويه الموت+
فوك الجسر تابوت+
من السجن حد الكبر- واجب تشيعوني
مسجون وبسم الغدر-ومغمض اعيوني

:::::::::::::

هذا امام الرافضه_وصاحو ابعالي الصوت
امنين اجيب المرتضه-ويتعارك اويه الموت
العمر مسجون وكضه-وهالطلعه للتابوت
همي ابكثر همي
محد حضر يمي!
ياشيعتي ابذاك السجن- شو ما تزوروني!
مسجون وبسم الغدر-ومغمض اعيوني

:::::::::::::::::::

ياشيعتي وكل الحزن_شفته ابسجن هارون
وبلا اهل وبلا وطن_كل العمر مسجون!
وايامي كلهن خلصن_صابر واكول اتهون!
كل العمر مأسات
حسره وتجر حسرات
ومأيس ابهذا العمر-ماظن يرحموني
مسجون وبسم الغدر-ومغمض اعيوني

::::::::::::::::::::


فوك الجسر وبلا اهل-مشموره الجنازه
وانه ابن خير العمل- هالساعه معتازه
هالجثه ومضيعه الامل-ياعازة العازه
وين العشيره اليوم
وتشيع المظلوم
مارايد اكثر وانتظر-رايد تدفنوني
مسجون وبسم الغدر-ومغمض اعيوني

::::::::::::::::::::

مسجون انه ابلا ذنب-وبلا ذنب مسموم
هاي النواصب ماتحب-كل رافضي ومعصوم
وبهل وصف تملي الكتب-يادمعة المظلوم
مانشفت ادموعي
ياشيعه موضوعي
ويه الامام المنتظر- بالثار اذكروني
مسجون وبسم الغدر-ومغمض اعيوني
::::::::::::::

ياشيعتي فوك الجسر_هالساعه تلكوني
مسجون وبسم الغدر-ومغمض اعيوني
موعدنه ويه الموت+
فوك الجسر تابوت+
من السجن حد الكبر- واجب تشيعوني
مسجون وبسم الغدر-ومغمض اعيوني
الشاعر حسين الساعدي
إضافة قصيدة