حزيران 7 2017

قصيدة بيك املوحة البصره!- منو يعرف كم مدينه و منطقه ذكرت بهذه القصيده! - الشاعر حسين الساعدي

بيك املوحة البصره!- منو يعرف كم مدينه و منطقه ذكرت بهذه القصيده!
الشاعر حسين الساعدي

بيك احجاية العشار!
بيك املوحة البصره

وبميسان الك تذكار
والهور اليجر حسره!

ما تدري باأهل ذيقار
لا حبوبي لا شطره

كلها اتصيح ياستار
لمن تنظر النضره!

عنك بالسماوه اخبار
كلمن حاير ابأمره!

والحله العليك ا تغار
بابل بره منتظره

يايوم التضوي الدار
صاحت كلها مبتشره!

والكوت ابهوه الجمار
بيك وهسه متعطره

طلعوا طشوا الازهار
من السده والبدره

ديوانيه الك اشعار
كلمن وصف ابشعره

هذا ايوصف الانوار
ذاكه الوصف الكمره!

هاكد ما تراعي الجار
هاكد صاين العشره

نوصل للنجف زوار
وانته التدعي بالحضره!

كون الكربله المشوار
حته العايل اتعثره!

لا تكفيري لا غدار
يوصلنه ونكف شره!

صلاح الدين والانبار
صدوا داعش ابكُبره!

لكن شافوا الاخطار
بيك وضاعت النصره

وديالى التريد الثار
منك هسه متحضره

عاين بالشمال اصار!ّ
صارت كلها محتره

ذوبت الثلج يا نار
بيك وغركت الجزره!

والموصل ازغار اكبار
منك رادت البُشره

تطرد داعش الغدار
عينك لمن اتخزره!

وبكرخ ورصافه اخبار
هذا اليوم الك مره

كراده اويه سبع ابكار
يم المنطقه الخضره

وكفوا وكفت المسمار
كلمن رايد اتعبره!

منصور والف يادار
ذبوا كتبه والطره

واليربح تجيه خطار
كلمن طابخ ابجدره!

خو زيونه والتجار
طفرولك فرد طفره!

واليم البنوك أعمار
كلمن دفتره امحضره

رادو صوره الك تذكار
حته الشافك اتسره!

دَخلت الرصافي انذار
محد واكف ابكتره

راد ايوصف الماصار
باشعاره التضل ذكره!

ويه الشعله والانصار
وحسينيه الك تبره

والصحه وشعب محتار
بين اليمنه واليسره!

بالنهضه وعله الدوار
كالو تبتدي السفره!

وبكل المدينه انصار
كلها اتناطرك بره

ياشارع والك يندار
من امريدي والكسره!

كالوا سيرت تسيار
والعاجل عله الحره

كلها اتريد الاستفسار
سرك ياهو اليفسره!

وانه ابقصتك محتار
وأبعد عنك النضره!

ليوين أكتم الأسرار!
ليوين أحضن الجمره!

وافكار التجيب أفكار
بيك وضاعت الفكره!

وجروحي الصفت طشار
والطبره ابأثر طبره!

ياساعه الهويت النار
يخايب ساعة الكشره
خايب ساعة الكشره
حسين االساعدي
إضافة قصيدة