ياقلب زينب؟

_ياقلب زينب؟_
حسين الساعدي
ياقلب زينب أريد أسئل سؤال
اشلون بيك اتحملت ذبح الحُسين

اشلون تتحمل صدى ايهد الجبال
والحسين الوَحَده ايريد المعين!

اشلون وتشوف الجسد لم النبال
ماتعرفه اشلون من صوت الأنين!

اشلون ماشيبت وبذاك القتال
والمصيبه ابكربله اتشيب الجنين

هذا عبد الله المثل ماي الزلال
انذبح عطشان ومضيع الحنين!

امنيلك هذا الصبر والارتجال
والجفوف امكطعه ايسار ويمين

ياقلب زينب تشوف ابهل نزال
طاحت الاقمار بالليل الحزين!

والصفوف الصفت ابكثر الرجال
طالبوا ثاراتهم بدر وحنين!

ال اميه المايعرفون الحلال
والحرام اوياهم ابليس اللعين

الوصف مطروق بيهم والمقال
والنسل من شجرة الحقد الدفين!

ياقلب زينب يضل سابع محال
ابطريق الشام غلطانه السنين!

هاي اخت عباس مابيها مجال
الأسيره التمشي ويه الحاقدين!

الشمس لبست الليل ابهل خيال
حتى ميشوفون خدر الطاهرين

هاي زينب ياقلب زينب تعال
اشلون تتحمل اهموم العالمين!

اشلون كدامك يزيد ابهل جدال
ابصولجان ويضرب ابثغر الحُسين
ابصولجان ويضرب ابثغر الحُسين!
حسين االساعدي