ذكرني بيك الورد

ذكرني بيك الورد ..عطره لنسيمك يرد
شفته لعبيرك عبد .. بس لا ابد ما يحد
عطرك يضل منفرد .. بيه الحزن مسرور

ضعت بضواحي الزمن .. كثرت عليه المحن
تاليها يمك رسن .. اهوائي يبن الحسن
من حملي طاح الوهن .. بالهم چنت مقبور

صوبني حبك سهم .. وابعدني عن كل الم
من ايدي طاح القلم .. بعيوني شفت انرسم
وجهك وابد مو وهم .. ضل الفكر مبهور

بفكاري لاحت جمل .. اكتبلك اجمل غزل
تغمرني لحظة خجل .. عن حبي انته اجل
لكن حنانك دخل .. گلبي وصرت مجبور

بالحب دليلي انغمس .. طهرته من كل دنس
شميتك اعذب نفس .. صدري بهواك انترس
كلمن يشوفك خرس .. كعبه وعليك يدور

منك ابد ما امل .. أمنيتي يمك اصل
والحب صعب ينحمل .. حبيتك اني وطفل
حب عاطفي وحب عقل .. شفتك ملاذ وسور

صبري بغيابك هلك .. رايد يغالي اوصلك
يمته يدور الفلك .. وبسرعه ارجع الك
وعيوني تتأملك .. بلكت تشوف النور

بضلوعي حابس جمر .. مايطفي ناره الصبر
لو ازفر البلصدر .. أحرگ بقايا العمر
ذكر البعد من يمر .. اكتب اضل اسطور

گلبي المحبتك عرج .. شافك ضياء و وهج
ولساني بسمك لهج .. يمته يمهدي الفرج
عجل تصيح المهج .. دينك صبح منحور

مثلك ابد ما يصح .. كل خصله عندك صرح
حار بوصفها الشرح .. لو بيه حبك جرح
انثر عليه الملح .. واصرخ يجرحي جور