سومر حلمنه من التعب

شـوك وتصاوير وعتب
سـومر حلمنه من التعب

نباگت ..
شموسك
والشعب تايـه بيك

كل الجناسي ..
البارحه أدور عليك

نقراك غاد من السمه نجمه وجرح
وماندري ذيـچ نحورنـه الفوك الرمح

ينگـط نـدم ..
شفنه العلم ..
طـم العبي بضهر التنـانير

غلبت زمن ..
ثاري الوطن ..
حبـلن بنـاتـه من النواطير

بعيونـه
يبـات
الحزن
حدر الدمع

نبچـيك
بس بـچي الحلم ماينسمع

حبال المشانـق تخنك الريح
شدوهـا برگاب المراجيح

والموت ..
شاتلـنه بأمس
أدعيلنه تخضر شمس

لاتعتب
أعله الـدين
ماضل أنسان
شفنـه الـعمايم ترگص ويـ السلطان

نيشان صرنـه والجفه يصيب
ويستنگه وين العاشك الشيب
چم دوب توجعنـه المكاتيب

وحشه ونعش . .
ولمن صعد سوك العطش
من ماي وجهك رحنه چملنه النهر

ضمينه سرك بالجدايل
أبابك دفنـه شكد رسايل

خوف وصدى . .
وذاك الندى . .
يابس عله شفاف الفلاليح

من مات ناطورك
مشه جنازه الكمر

وفانـوس عمرك
طفـه بچـويات المطر

شفناك
فوك الشاطي
تيبس بهداي
أودينـه بمتـون السفن ديرة ماي


عتگت شبابيچ المحاجر
يهلال باجر يمتـه باجر

من برد تاريخك
برد دم الشعب

وباعو جناسينه
بدگـاگين الحطب

غربه وسفر . .
تهنـه بتجاعيد الدهر
عيون الغريب تصير سولتها الصور

چف الصبح . .
ضـم الصبح . .
ماوگفت بعينه العصافير

آخ الوطن . .
ثاري الوطن . .
حبـلن بنـاتـه من النواطير !

ناصر البدري