شباط 14 2021

قصيدة لا تعتب اعلى المشه - الشاعر ظاهر الاسدي

لا تعتب اعلى المشه
الشاعر ظاهر الاسدي

لا تعتب اعلى المشه خلي المشه لحاله
والبير مابي سمج وشتنفع الفاله
يا كلبي لا تنتظر
الفرح يمك يمر
يخلصن سنين العمر
والباقيه اوشاله
بالكيش اغرك صرت
ومن هذا هم ما خفت
خايف يمرنه الوكت واغرك بالوشاله
يا كلبي طبعك سمح
وشبيك وما تنصح
العـلخيل هاي اركبت مو كلها خياله
لا تحمد انت برجل ودكول كول وفعل
تبين لزمته الرجل من تبين افعاله
مو كل حجي ينفرض
ميهمني طول وعرض
مبين مضيف الكرم
من دكة دلاله
بس حجي هواي سمعت
ومن مالهم لا ما شفت
والمايلوح العنب ما يترس سلاله
بالعشرة اكسب جرح
ولغيري ضحكة ومرح
والناس مرهه الفرح
واني انطر اهلاله
مو طبعي انغش ترة
بس هلزمن قشمرة
راوني حنطه الوكت بس باعني انخاله
القصيدة كتبت عام 2014
إضافة قصيدة