تبقه الصور بالذهن

تبقه الصور بالذهن من بالي ما تنشال
كل صفنه بيه الزمن يرجع وشوف الحال
اذكر كلامه ويضل دمع الجفن همال
وهنا گعد وشحچه من انسأل وشگال
للواقع ارجع وافز وانظر فراغ الصار
تنزل دمعتي واحس چان الحلم خطار
كرسيه فارغ صبح وحشه بغيابه الدار
ومطويه سجادته تنتظره ليل نهار
عكازتك من رحت رادت تروح وياك
چانت تحسك سند هيه الي تتوچاك
چفيتك مكتّره وبيه عطر ذكراك
مشتاگه تسمع هلا بابك تحب ملگاك
والعيد اجانه وسأل رايد يعيدك چان
ومر بينه شهر الحزن وتشاطر الاحزان
والموكب بكل سنه ينتظرك بأشجان
تلبس ثياب الحزن هيبه وصدر ديوان
وروحي بغيابك صفت مشتاگه للچتال
دنيه وبلا شوفتك ما تسوه حفنه رمال
انته الربيع والك عمر الورد لوطال
رحت وبعدني انتظر واتقوّت الآمال

ابو قاسم الملا