مدري ليش!!

مدري ليش
الشريف ايموت خاطر,,ناقص ابمنصب يعيش!
حسين االساعدي
:::
الوكف عالجبل يسلم,,يدري كلشي مايلوحه!
يبقى متكتر وخاتل, طالما ما ينطي روحه!
عود
من
تكضي المعارك,,
بالصور يمشي ويشارك
عالجثث يصعد يصور, ,
حتى راح ايسوي نفسه,, منتصر عود اويه روحه!
واذا عنده اضماد زايد,
خله يرسم ,, روحه مجروح ابهجوم ,, ويلبس اهدوم المجاهد!!
شرط كون الصبغ احمر,,
بالضماد الضمد اجروح المخاطر
حتى تنتخبه القشامر ,,,,,
ابكثر ما , بالصبغ نزفت اجروحه!
ويفتخر
يم الجماعه
ابصوره مخدوعه ابخداعه!
حتى يهتفله المطبل
يستحق نوط الشجاعه!
والشهيد الضل يقاتل,,,, لاجل ذاك الجان خاتل
هذا رايح ما نذكره ,,
رايح وهلروحه روحه!!
مدري ليش
الشريف ايموت خاطر,,ناقص ابمنصب يعيش!
الدنيا يمكن للجبان!
والدليل
ابلمة اذيول المذله,,الصاروا ابكل برلمان!
وهايه مو شغله جديده!
الوطن ينسه شهيده,,,والجبان ايصير حاكم,,
يحكم ابكلشي اليريده!
من سرق نصر المقاتل--غشمة صاحو عاشت ايده!
وموغريبه
ابشيبتي وتطلعلي شيبه,, الشيب يعني من يشَيب
بالوطن صارت مصيبه!
كلشي عادي
المنصب الينباع يكدر فاشل افلوسه التجيبه!
عادي لو ضحكه وكيحه,,,اتعير ادموع النجيبه
ابكل زمان وكل مكان
عادي ربع احسين قطرة ماي بالحسره عليهم
وشلة ابن ازياد ماي الكاع واليمطر بديهم!
امتحان الدنيا غربيل الزمان
اتريد شاطر حتى ينجح,,مايطيح ابساحة الذل والهوان!
اتريد جايع عنده أكله
ايدور الجوعان مثله
حتى يتبرع باكلته,, الذاك المضيع الحنان!!
امتحان وصعب ننجح,
والرياء ميطول ابهذا الرهان!
والعجيبه اهواي وادم,, جنت شطار اعتبرهم,,سقطوا ابهل امتحان!!
سقطوا ابهل امتحان!!
حسين االساعدي