المشاهدات: 2103   المدة: 19:09   الدقة: عالية
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة Zahraa ❤ Al obaidi
خيمة الحُب والوفه ، والعاطفه ، وشمعة حياتي
إنتي ميتة لو أنه ، ظهري انحنه ، وحانت وفاتي

گلبي ماشال المصيبه .. شايل جنازة حبيبه

گلبي ماشال المصيبه .. شايل جنازة حبيبه
..

حيدر وعندي الحرب ماتسوه شعره
مو هذاكه الما يرد سيفي من اشهره
تراجفت كلي على وداعچ يزهره
الموت مو خيبر تره وأگدر أكسره
والهجر مو إبنَ ود خاطر اشطره
شايلچ مدري شلت عمري إعله كُبره

الچانت لروحي ولف ، فوگ الچتف ، شايل نعشها
والأميره اعله النسه ، حقها انسه ، وهدموا عرشها

انحسبت إحساب الغريبه .. گلبي ماشال المصيبه

___________

أرتجز وگت الحرب واحچي الأريده
سيفي مثل احچايتي هم ما أعيده
الفارس اليشرد چنت بالخزره أصيده
مو على بالي هذن وإنتي بعيده
حالي حال الينذبح گدامه عيده
من شفت باب الملك دفعوا عبيده

حرگوا الباب وشفت ، وتعذبت ، بس مو بديه
وعاتب السيف الغمد ، شو ما ترد ، گتله الوصيه

حالتي والله عجيبه .. گلبي ماشال المصيبه

___________

ياگلب حيدر علي بگلبج مكاني
غسلت روحي لمن غسلتچ آني
لويمد أيده ويجس نبضي زماني
ميت ابدونچ ولا عايش لگاني
عمرچ ابطول النده وموتچ ثواني
ما أغطيچ ابچفن كون ابحناني

والقدر حكمه انفرض ، بس النبض ، حافظ وعدنه
گلبي وي گلبج يدگ ، شوگ وعشگ ، مهما بعدنه

ياعشگ عمري ونصيبه .. گلبي ماشال المصيبه

___________

داخل ابچم معركة موت وخضتها
أهزم ابسيفي دول لو نازلتها
لاچن افرگچ حرب ماجربتها
دنگت بيها وشفت مرها وعشتها
جنازتچ دنيه وعلى چتافي شلتها
وشيعت معنى الفرح من شيعتها

ينزل بخدي دمع ، يشرح وضع ، حالي برحيلچ
إنتي شلتيني عشگ ، آنه صدگ ، بجنازة اشيلچ

الطيبه اليجازيها طيبه .. گلبي ماشال المصيبه

___________

أحفر بـ لحدچ واسولفلچ عليه
مو علي چني وعلي حامي الحميه
ولا هذاكه اللي شمس ردت إليه
الچنت صاگرهم صگر هجموا عليه
وكسروا اجناحي بكسر ضلع الزچيه
والفقار امچتف ابحبل الوصيه

سمعوا موصي النبي ، وأهل العبي ، شافوا حجابچ
والله لومسموح إلي ، وداعة علي ، شيحرگه بابچ

بيهم آنه أطفي لهيبه .. گلبي ماشال المصيبه

___________

وارجعت ونة مُحب مجروحه ونته
بلايه گلبي والگلب يمچ دفنته
دمچ الـ عالباب انه بدمعي غسلته
والمكان البي عطر منچ حضنته
وزينب اگبالي جرت دمعتها سكته
ما بقه گالت بعد بس الله وانته

طاحت الخيمه وبعد ، الله الأحد ، وتگله يمه
اليلبس ثياب اليتم ، من ينلچم ، جرحه اشيلمه

وشيلم دمع السليبه .. گلبي ماشال المصيبه

___________

يادلالي وهيبتي وزهرة زمانچ
ماليه البيت ابدفو طيبة وأمانچ
چانت الجنه تجي وتغفه ابجنانچ
والحسن وحسين اجو شافوا مكانچ
دوروا بي ما لگو ريحة حنانچ
كلمة اليمه شكثر حلوة بـ لسانچ

حضنچ أحله من الوطن ، طول الزمن ، يمطر محنه
واسمچ الغالي انكتب ، نور وذهب ، وحروفه جنه

رحتي والراح اشيجيبه .. گلبي ماشال المصيبه

___________

كلمات الشاعر - أحمد الذهبي
،،