المشاهدات: 3680   المدة: 18:59   الدقة: عالية
التصنيف: صوتيات دينية   الكلمات الدلالية: مرتضى حرب
تعليق بواسطة صفاء العامري
صفنة ليش ابوجه المــاي
ينراد إلها ادموع اهــواي

حاير شفتـك . وانظر شفتـك
لهبة خيـمة وكلمـة جــاي
_____________________________

دورت بين العطش ودموع الايتام
عن علامه اتگلي وينك هاي الايام
انه صوبني سهم وبگلبك اسـهام
جرحي ركضة خوف وانته جروحك اخيام

شوف اعيوني ودور زيـن
ماظلت بس كلمة ويـن

ماضيعتك . وانظر شفتـك
لهبة خيـمة وكلمـة جــاي
_____________________________

ضيعت وجه الصبح ومعاشر الليل
چلمتي گطرة ملح بس ناحـرة سيل
صفنتي طفلة سبي وتسولف الخيل
والمسه ضحكة شماته والصبح ليل

واتذكرتك لحظة خـوف
شفتك راية ابلايه اچفـوف

من حشمتك . وانظر شفتـك
لهبة خيـمة وكلمـة جــاي
_____________________________

خطوتي طيرة ابمطر والسچه صياد
واشعر ابطعم السبي واحزاني جلاد
واعرفت جرح الخيم من شفت الرماد
وباوعت صوب النهر والواقع انعاد

شفتك شايل بيدك جـود
گتـلك وعدك يالمـوعود

تحچي ابصمتك . وانظر شفتـك
لهبة خيـمة وكلمـة جــاي
_____________________________

ميزت طولك لإن تشبه العبـاس
وشبهت نفسي طفل والفارق احساس
شابت اليمته وشبت ومدنگ الراس
والعتب شيخ الحچي وادمـوعه تنباس

بيـن اعيـونك دفعة بـاب
وإعله ازنودك خيـط احجـاب

ودمعة عمتك . وانظر شفتـك
لهبة خيـمة وكلمـة جــاي
_____________________________

كشخة الظالم إذا تبـچي اليتيمات
وكشخة الماي ابـحرگ خيمـة عـزيزات
شفتك وصوت العطـش يطوي المسافات
والجرف چم ليش يحمـل واعتذارات

لا تتعذر موش العيد
حگ اليوگع مدة إيد

آنه ابـختك . وانظر شفتـك
لهبة خيـمة وكلمـة جــاي
_____________________________

يـالغبت غيبة نفس والمثلي غرگان
والدمع مهما كثر مايروي عطشان
والجرح من ينلچم رايدله ديوان
حاچيني حته انكسر والگاك عنوان

وآنه ابگلبي اهـواي اعتـاب
رگضة زينب بيـن اجنـاب

من عاتبتك . وانظر شفتـك
لهبة خيـمة وكلمـة جــاي
_____________________________

شفتك إعله التل طحت واسمعتك اتنـوح
اتذكرت عمتك لمن صاحت بـلا روح
نادته ميت يخي لو إنته مجـروح
وصلت وسوط الشمر گال إلها مذبـوح

صاحت خويه ورگضت ليـه
لـن الخيل اتـدوس اعليـه

يابعد إختك . وانظر شفتـك
لهبة خيـمة وكلمـة جــاي

_____________________________

كلمات الشاعر _ السيـد عبـدالخـالق المحنـة