المشاهدات: 707   المدة: 5:09   الدقة: عالية
التصنيف: أشعار وقصائد   الكلمات الدلالية: عطا السعيدي، احمد العثمانيے، Ahmed Alothmani
تعليق بواسطة أحمد العثمانيے
عاشرتك سراب وعطش حمة گيض
واطرد عالسراب إبلهفت الضامي
واشوفك ومن اجهبك شبح ترس العين
وتذوب اتلاشى وتخدع أوهامي
وأمد إيدي أرد أكظك .. شكظ ؟؟ ما الگاك
ويلفني الدرب والگاك گدامي
وألمك بين إديَّة ويرد جفي ابلاش
هم شفت السراب إيبرد الحامي
ويهدهدني التعب و أرجع مثل ما جيت
هيمة وچلن من طرادها أجدامي
گضن عشرين حول وهاذ حالي وياك
لا مرواح ذرة ولا دست هامي
وتوهمت أبعشرتك ما حسبت أحساب
وشنفع الندامى وعضت أبهامي ؟؟
وتعلگت بوهم مثل الزرع خرنوب
ويساچي وبناه ايطگ عنب شامي
ودفعت الثمن غالي وياك ثلث اضعاف
شبابي وطيش عمري وثورة احلامي
وگلت افطر وأعيد ما لگيت العيد
ولا شفت الهلال وفتت بصيامي
يالكلك مرار وعلگم وذرنوح
ياخابط كدر ما تنجرع طامي
أذمك وأذم روحي وأذم حظي أعليك
لا تهواك روحي ولا انتَ ولامي
وألوچگ طعم حنظل تگطع الزردوم
واتمطگ جذب بعناد نمامي
واحسك بالمفاصل مثل حمى الخيل
صيخ من الألم واسلال بعظامي
ما محتاز منك غير بس فرگاك
يالفرگاك عيدي وجيتك آلآمي
فلا انتَ أهتمامي ولا غرض دنياي
ولا حاجاتي نفسي ولا وحي الهامي
يا نغمة نشاز ووتر ما مضبوط
شوهت الجمال الچان بنغامي
انتَ اصل أنكساري ورخص عمري الفات
والذل والشگة ونقصان بخيامي
وانتَ بكل كتر بعظاي إلك طعنات
ماضل عضو مني صحيح مادامي
ابات أبَهم وأصبح والهموم أرداي
لابسهن مثل تفصال هندامي
صارن بعض مني وطابگني أطباگ
حتى أغذاي صار هموم ويدامي
العف من عشرتك ياولك ياهيّه
لا انا ارهام طبعك لا انتَ ارهامي
گضن شطرين عمري وشطر عندي الضال
خل احفظ الباقي الضال بيامي
انا بثوب المگابر بس بقايا انسان
أريد أختل بروحي واجمع أحطامي
وصل بيك الصلف والبطر حد الطيش
تتدفى اعلى ناري وتحرك ارمامي
تطلبني أبطلب ؟؟ لو الك عتبةة وياي
أشمرك تٌوّح إديَّ وترد متحامي
اريد أشطب وجودك من سجل دنياي
واكفر بالصحايب واكسر أقلامي
غلطة عمر لكن كلفتني هواي
مثل الدفع دية وهوَ مو رامي