المشاهدات: 414   المدة: 15:05   الدقة: عالية
التصنيف: صوتيات دينية   الكلمات الدلالية: باسم الكربلائي و عبد الخالق المحنه
تعليق بواسطة hamza al-yassiri
صاحب يكول الصاحبه
حين الوصل ظعن السبي
ذاكه العلى راس الرمح
وجهه مثل وجه النبي
وجهه مثل وجه النبي


ياصاحبي هذا الظعن قادم تره من كربله
كالو خوارج والشمر هوه اليقود القافله
امشي نباوع للظعن نعرف نسب هالعايله
بس الغريب ابهالظعن حته الأطفال امكبله

عدهم فرد واحد عدل
شنهو السبب مامنقتل
يمكن لان صابه المرض
لو عنده سر ياصاحبي

___________________________

ياصاحبي وضعي اختلف شنهي التغير ياتره
جني اباوع فاطمه لمن شفت هاي المره
مهيوبه هيه وشامخه عفه وخدر وموقره
جن لبوه لمن تلتفت ماجنها حرمه اميسره

ياصاحبي رايي اختلف
ذوله اهل غيره وشرف
لا مو خوارج وعرفت
هاذي دعاية ناصبي

___________________________​


شاف العليل وراح اله سلم عليه وبكل خجل
كله يمولاي اعتذر احجيلي شنهو الي حصل
من ياعشره سيدي من يابلد من يا اهل
ليش الرجال اتذبحت وال بالمهد هم انقتل

هاي الوقوه اتحن الك
بت من؟ ارد اسألك
ترجف اديها وتنتفض
من ينظر الها الاجنبي

___________________________

كله استمع يا سائلي لكن دمع عينه جره
هذا الكلت يشبه نبي إبن الزجيه الطاهره
ذيج العله الهزلة تون زينب وابوها حيدره
ذاكه الذي ابعينه سهم كافلها سبع الكنطره

هذا الشمر شتوصفه
ذابح أبويه من القفه
ما ظل بعد عدنه زلم
لا هاشمي ولا طالبي

___________________________

يا سائلي انظر على هاي اليتيمه الي بجت
كله شفتها سيدي ابطرف العبايه اتعثرت
تركض على ذاكه الرمح جا الطيره بس ما وكرت
هاذي رقيه الغاليه شاء القدر وتيسرت

كل البدور الزاهيه
ظلت جثثهم عاريه
ماقصرت شمس الضهر
كلت الها ياشمس اغربي

___________________________

ياسائلي وعندي طلب اجرك على راعي العلم
احجي ويه شيال الرمح خل يمشي كدام الحرم
شيبة ابوي وهيبته تشغلهم وهذا الاهم
تتفرج اعلينه الخلك فوك المصايب والالم

نتحمل اسياط الشمر
بس لا ينظرون الخدر
ياسائلي شكراً الك
حقق إليه مطلبي

__________________________

رد الصحيب الصاحبه يلطم على وجه ابحذر
ياصاحبي اخر خبر ذبحو محمد عالنهر
ياويلي ومثلث سهم ابصدره وطلع من الظهر
وخيمهم احتركن سوه والخدر أتصيح المفر

ياصاحبي وزينب تون
كسروا ظهرها والمتن
من تحسب أيتام وحرم
صاح الشمر لا تحسبي

__________________________

ياهل خلك غضو البصر ذني شرف حامي الحمه
زينب اذا تدعي تره دعوتها دعوة فاطمه
لوترفع اصبع بالدعه فوك الارض توكع سمه
هذا الحسين الكوثري تالي يموت من الظمه

خيل اعوجيه السحكته
شالت قسم من جثته
بعتوا الضماير والشرف
يعني اشيفيد امعاتبي

___________________________

الشاعر السيد عبدالخالق المحنة