المشاهدات: 2255   المدة: 20:40   الدقة: عالية
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة ♪ Ašk ♪
محرم هـلاله ، الحُـسين وجماله
اموت ابغيابه ، اعيش ابوصاله
اجاني واجيته ، عمر مانسيته
" الحُـسين وجماله
الحُـسين وجماله "

1

انا الـكل عام لابس أسود وانعه
انا ابن الاربعين وليلة الجمعه
رجع عاشور بس حسين شـيرجعه!
ثواب اوصاله عالگيعان متوزعه
تهل يهلال معناها تهل دمعه
ابوالتسعه الاصابع بيده بس تسعه

تجيني ابمصايب ، واجيك ابمواكب
عشگ بالطفولة ، وعشگ وانا شايب

حفظته وقريته ، عُـمر مانسيته
" الحـُسين وجماله
الحـُسين وجماله "

2

عمر گضيته من منبر إلى منبر
اشوكت ناسي محرم حتى اتذكر
الهلال ابوحده طالع والظلام اكثر
هـذاكه حسين طالع وحده للعسكر
الهلال يرد هلال وصعبه يتغير
ابو الاكبر طلع رد راس ابو الاكبر

برماح العوالي ، هلال ويلالي
هلالك محرم ، اعز لو هلالي

جوابي لگيته ، عُـمر مانسيته
" الحـُسين وجماله
الحـُسين وجماله "

3

يشهر الما يجي بس الحزن منه
يـالـمّطلع علي امّفرع من الجنه
هلالك شـفته والد منحني اعـله ابنه
اليطيح حسين لازم يركض ايحظنه
ابعرس جسام رملة هلهلت ونه
ابرماد الخيمة تلگه الياس والحنه

يشهر النياحه ، يگلبي وجراحه
من الليلة تبدي ، وبعد ماكو راحه

عزائي بديته ، عُـمر مانسيته
" الحـُسين وجماله
الحـُسين وجماله "

4

الهلال ابـيا وجه هذا الشهر طالع!
عجيبة اشلون يكمل والگُمر واگع
لهسه فاطمة اعـله المشرعه اتنازع
بُني عباس ناس الــزينب اتباوع
محرم للحـُسين وخاف ماسامع
محرم ثاني عندي ابـليلة السابع

لطمتي اونيني ، مثل جوده عيني
ادگـ اعـله راسي ، واطـين جـَبيني

عـَطش مارويـته ، عُـمر مانسيته
" الحـُسين وجماله
الحـُسين وجماله "

5

هلالك ياشهر لو ما يهل افضل
يراويني العقيلة اتـصلي عـالهزل
القبل ما طالعه طلعت ركض للتل
شنو اموديها لارض الشام ماتندل
يريت "امي" السبوها ادعي واتوسل
ولا "زينب" على ابن ازياد تتحول

جواري الاماره ، إجن عـاليساره
يشمرن عليهن ، كلام وحجاره

وعـلي ذاكه بيته ، عُـمر مانسيته
" الحـُسين وجماله
الحـُسين وجماله "

6

شهر حـزنك يجي دوماً على الميعاد
جديدة اجروحك اشما تنقره وتنعاد
يـما ترحم يـالمشيب علي السجاد
يالمضيع المسلم بالصحارى اولاد
محرم بيك راحت روس عالمياد
سفر هوَ اليرجع الروس للاجساد

يضل يجري دمعي ، واضل خادم ادعي
تروح وتجيني ، وانا بهذا وضعي

يدمعي الـبچيته ، عُـمر مانسيته
" الحـُسين وجماله
الحـُسين وجماله "

7

فتحتي اجروح ياعاشور ماتنسد
السما خد وهلالك دمعه فوگ الخد
اشوكت وي ردة اهلالك يجي الما رد!
اشوكت خيمة رقية التـشتعل تـخمد!
اشوكت جمرة الحِچه عنها النبي تبرد!
اشوكت ثواب الحسين المنسلب يـنرد!

احير ابسؤالي ، تغثني الليالي
يجي المهدي يمته ! ،
ويرد كولشي غالي

إلهي دعيتـه ، عُـمر مانسيته
" الحـُسين وجماله
الحـُسين وجماله "

كـلمات الشاعر : حـمزة السـماوي