المشاهدات: 231   المدة: 5:22   الدقة: عالية
التصنيف: أشعار وقصائد   الكلمات الدلالية: عبد الكريم القصاب، محمد الاميري
تعليق بواسطة أحمد العثمانيے
وحشة وليل مطفي || الشاعر عبد الكريم القصاب
صوت : محمد الأميري
================

كلمات القصيدة :
وحشة وليل مطفي وصفنة امحبين
ومامش بالعيون انعاس
مامش غير ملح جفون
ومكابر جرح ومناطر ووهواس
يفتر العطش بالروح
يفتر الحزن بالعين
يفتر الوطن بالراس
شيغمض جفن رمشه ملح وتراب ؟
شيغمض جرح ينگر بجرفه غراب ؟
محبوسة الشمس والليل دوخة راس
ديره بلا شمس، لاگمر دوخة راس
ديرة بغير عش للطير، للإنسان
دوخة راس
ديره بلا جرف للوردة، للبستان
دوخة راس
ديرة خوف مترب والذياب اجناس
ديرة خوف
والوجه النظيف مرايته الظلمة
محروگة المري وتنكسر من تنجاس
گصر فيّ الصبر بالروح
عشب مرعي الصبر، ماطال فيّ للروح
وسفة من الصبر ذلت هواي جروح
بس ماذل جرح حساس
جرح دمه عصب وإحساس
جرح كلما كبر ينباس
ياشمعة عرس، ياروحي ظليتي
مثل گمرة حزينة بلا غنة ولا كاس
بطى مهر الشمس، ماجفل الحراس
ها يكحيل، يمغتر بطيب الگاع
لانك ما اجيت بساع 
بطى وجه الصبح عالناس
ها يكحيل، وين انت ؟
بعيد انت
جريب انت
دمعة عين طفلة، امغتر تجيبك
نشغة خيط جرغد، بيرغ تجيبك
غترتك بيرغ الغبشة
واصابيعك مشط للياس
ها يكحيل ،يمعدل
لذيذة سوالفك تنباس
مثل خد العروس سوالفك تنباس
يالمشذر عشگ ونجوم
يالمشذر قصايد، گوم
فك باب الصبح وانده وتر فيروز
والمي والبلابل والعشگ بالناس
يالمشذر عشگ
جيب الصبح للناس
هاگد شوگ بينا لشمعة الغبشة
ترفة أرواحنا
وفوگ الشفايف مايعة
وخد الصبح ينباس
يستاهل صبحنا الجاي بوسة روح 
يستاهل صبحنا من الفجر ينباس
يمفتاح الشمس، جيب الضوه للناس  
وج فانوس بالغابة
فك باب الضوة ، يابا
مطفي الليل والماله ضوه ينداس
كل شي بلا ضوة ينداس
بالظلمة الشذر ينداس
بالظلمة الوجه ينداس
بالظلمة الشرف ينداس