المشاهدات: 6923   المدة: 15:22   الدقة: عالية
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة عِشـق ❤️♪
ليلة 4 شهر محرم الحرام 1440 هـ
قصيدة: وين
أداء: الحاج باسم الكربلائي
كلمات: الشاعر ميرزا عادل أشكناني
المكان: هيئة شباب الأكبر (ع) - لندن


الكلمات
_________


وين .. ضي عيني حاچيني
ليش ابظعنه ما رد
وين .. الدگ صدره ب هالسفرة
وبخدرچ تعهد

وين .. عافوچ الغوالب
عافوچ الغوالب

................

من اجه الناعي وگـصدته
عن بنيني ما نشدته
گـتله عن حسين سولف
عجبه مارد ويه اخته
غورگت عينه ابدمعته
گـلي چـلمه ومافهمته
منهو راسه اعله العوالي
وشنهو ع التربان جثته

صاح
والسبعه
من ينعه
ترتج ابونينه

صاح
يا حره
چم طبره
حسين امطبرينه

صاح بالحر خده ذايب
بالحر خده ذايب

....................

عفته وبشوغه حنيني
اصفـچ ايساري بيميني
واوگف ابـسد الضعينه
ع الوجوه اتدور عيني
من الشمس لونـچ تغير
ماعرفتـچ سامحيني
اشـ بدل ارسومچ يـزينب
بالجرالـچ خبريني

ليش
من شفتچ
م عرفتچ
من گـد ما نحيله

ليش
شيبتي
چـن انتي
مو انتي العقيله

ليش وجهـچ لونه شاحب
.. وجهچ لونه شاحب

..............

عن خبر بشر ابن حذلم
خبريـني وانتي اعلم
وانظر ابـ ردة ضعنكم
ع المحامل جامد الدم
والهوه لو مر عليكم
ريحة الدخان تنشم
مدري هـالمحروگ گـلبج
ولا محروگ الـمخيم

نار
بطنابچ
بثيابچ
ياعظم الهضيمه

نار
من تسري
ما ادري
تحرگ چم يتيمه

نار شبت بالمضارب
شبت بالمضارب

..................

وانشد ابـدمعه الأهلها
هـالفواطم وين أهلها
عليمن ام كلثوم تنحب
وين راعيها الكفلها
اشبيها ام اولاد مسلم
مدري شنهو الضايع الها
والرباب انجان هاذي
وينه عبدالله طفلها

خاف
واحدها
من عدها
راح و رفرف إيده

خاف
صدتله
والنبله
مغروسه ابوريده

خاف نجم اسهيـله غايب
نجم اسهيـله غايب

.......................

چـملت وناتي ونه
وللسؤال ابروحي ظنه
هالظعن لمن رجعلي
اهوايه مفگـودين منه
ليله منهو الي تگـصده
ابعز شبابه ما تهنه
رمله من تلطم بديها
جن بديها آثار حنه

شاب
بالزفه
وبچفه
دم نحره خضابه

شاب
راس امه
والـ عمه
مايغله شبابه

شاب عرسه ويه النوايب
عرسه ويه النوايب

....................

جمره ظلت تسري بيه
ردي يازينب عليه
اشما ادور باليتامه
ماشفت بيهن رقيه
مدري طاحت من جملها
وضاعت ابديره اجنبيه
لو على منحر ابوها
تالي وافتها المنيه

حيف
لو طفله
متألمه
لوالدهه تضمه

حيف
تاليهه
ايمر بيهه
راسه ابلايه جسمه

حيف ماتت بالخرايب
ماتت بالخرايب

.....................

الساتر الله من الهواجس
وانشدچ والريچ يابس
گـلبي لاچـمني يزينب
جي بقيتي ابلايه حارس
لوصدگ ذبحوا كفيلج
يعني طبيتي المجالس
يعني بالديوان انتي
واگـفه ويزيد جالس

يوم
مكفوله
محموله
بالعز والمهابه

يوم
مكسوره
مأسوره
ونزلوچ ابخرابه

يوم بي شفتي العجايب
بي شفتي العجايب


....................

كلمات الشاعر : ميرزا عادل اشكناني

...................


تدوينZahraa Al obaidi

درر العراق ١٤٤٠