المشاهدات: 2208   المدة: 17:38   الدقة: عالية
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة ❀ ♬ Ashk
عِشّاگ .. وإنته العٍشِگ
للموت .. مانِفتِرِگ
عَلّمنه الگُمَر.. نفديلك نَحَر
قُربان الولائَك
*************************
دِخَل حُبّك إبدَمنه إوبالمسامات
الحمُر والبيض وإبكل الكُريّات
الحَبّك مات مو من كِثُر طَعنات
قَسَم يحسين من كِثْر العِشِگ مات
لوما شَمِس عِنده إويه المَجرّات
أضِن حَطَّك شمِس رب السموات
يانور .. رب السِمه
ياثار.. دم فاطِمه
يا لاء الرَفُض .. ثوره إبكِل أرض
تِشعِلها إبدِمائك
***********************
نِحِس ماي الفُرات إشما شِربناه
حَرِگ طَعْم الخيم بالماي ضِگناه
صوت الروج مو صوته لگيناه
صَدى الميمون يصهِل بي سِمعناه
مو بَس حِزِن شايل من نِشدناه
الماي إمشَيِّب إعله إحسين شِفناه
بالماي .. طَعمْ الألَم
دخان .. نار الخيم
والصوتَك صَده ..ضل طول المَدَه
صَرخَة كربلائك
*************************
نسينه إعله الرُمِح يوم العِشگناك
روس إبلا جَسَد بس مانسيناك
نازِل وَي جِنِح جبريل شفناك
دُعاء الجَوشَن اوبالطف قريناك
الـ بالسِر والعَلَن يحسين عاداك
حَرُب ويّه الله يعلِن موش وياك
والراد .. ضِدّك حَرُب
قَدْ خان .. كل الكتب
ضِد رَب السِمه .. حربه الظالِمَه
مرفوضه إبقضائك
***********************
تَعلمتو العِشِگ يالتسأل إمنين
علمنه العِشِگ عباس لحسين
گال اليحب لازم بيه شرطين
أوّل شَرُط فاگِد بالسَهَم عين
وإيعَفُّر على التربان خَدّين
وشرُط يحضن حبيبه بغير چفّين
مشروط .. هذا الامر
لحسين .. يفدي العمُر
وإيگلّه أعتِذُر.. كل هذا العُمُر
يالغالي فِدائَك
***********************
مجانين إبمحبتك خَل يگولون
أبَد موعاقِل المو بيك مجنون
عيون المابچتلك تعمه العيون
وصوت الما صرخ لبّيك ملعون
نحچي إبصوت عالي وخل يسمعون
مِثل حسين وين إحسين يلگون
يحسين .. طول الأزَل
بس بيك .. باقي الأمَل
دنيه إوآخِره .. يخسرهن تره
المايسمع نِدائك
**********************
دَم المايحِبّك خل يشوفوه
شَرُط من نطفة الشيطان يلگوه
كل ما رادو الحُبّك يهدموه
شيعتنه بدمع عاشور يبنوه
قَسَم كل شيعي لويعرف يذبحوه
ميگدرون عن حُبّك يمنعوه
هيهات .. ماينمنع
لحسين .. هذا الدمع
شيعي إبكل زمن .. لابسلك چِفَن
يتأمّل جَزائَك
*******************
عرفونه نحِبّك يابو الأحرار
رادو طف جديد إويانه يندار
لجل حُبّك فزعنه إزغار وإكبار
وقدّمنه المناحر مثل الانصار
ردّينه إبصدرنه النار بالنار
وحلفنه انموت بس مانترك الثار
والله .. يَبن النبي
مرتين .. ماننسبي
كل شيعة علي .. ياشبل الولي
منصوره إبدُعائَك
***********************
عن موضوع حُبّك والقرابين
ماخَلّت وَرِد عدنه السچاچين
الوالد والوَلَد يحسين ميتين
السبع سنين عمره إو أبو السبعين
كون تريد أقدّملك براهين
صور يحسين متروسه الحياطين
يحسين .. دَمهُم نِزَف
لعيون .. سَبع النَجَف
بالحق طاعِته .. لَبّت فَتوِته 
مِتغطيه إبرِدائك
_____________________

كلمات الشاعر : ناظم الحاشـي