المشاهدات: 1009   المدة: 15:29   الدقة: عالية
التصنيف: صوتيات دينية   الكلمات الدلالية: فاقد الموسوي، Zahraa Al obaidi
تعليق بواسطة ❀ ♬ Ashk
ليش اليحبـوني .. لازم يتعبـوني
يافـرحة عيـوني .. من چـانو اويـاي
صار الهجـر مـوتي .. والفـرگة تابـوتي
لوصيـحت صـوتي .. مايعبـر اشـفاي

كافي يادنيا بعد مابيه حيل
فارگت حد ماطلع بعيوني شيب
آنه غالي وچانو ايسـموني خير
هسه واگف والتفت مثل الغريب
الفاگد تبين جروحه ابلايه شوف
يعرف المجروح حتى المو طبيب

آنه المثل روحي .. من عدهم اجروحي
عافوني وي نوحي .. وآنه الهم افـيـاي
____________________________

فارگت وين المثل روحي ولگيت
المثل روحي ايتعب ابوكت الوداع
ماي واندل من أطيـحن وين أطيـح
صعبة عالينـدل إذا صاحوله ضـاع
عافني الشايل خيالي ابين اديـه
الچان ينغث لو مشه اخيالي اعله گاع

هسه اختلف حالي .. گمت اسحل اخيالي .. غالي بظهر غالي .. واتنطر الجــاي
____________________________

عودوني اعله الضوه وطفو ضـواي
دنيا وصياح وأحس مابيها صـوت
چانت الناس اشكثر بس إحنه روح
وچنه مثل الدم إذا نطلع نموت
چنه نتگاسم هـوى الله ومستحين
والسوالف للگلب چانت تفوت

هسه اشهگ انفاسي .. وأعثر واهز راسي .. واتطشـرّت ناسي .. يادنيه بهــداي
____________________________

خلصت روحي وبعدّ مابيه روح
كافي يادنـيه اشوكت يوصل سراي
آنه فارگت اليحط گلبه اعله اديه
ولو ردت روحه يگلي اشويه هاي
آنه عطشان اعله وجه الما يجون
كون اريدن ماي اسوي الدنيه ماي

اسمع گمت صـايح .. معقولة ضل طـايح .. مو للعطش رايـح .. هوَ آنه أبو المــاي
____________________________

كلشي هين بس صعب فگد العزيز
يريد حيـل وآنه ماضـل بيه حيل
هوَ اليضل وحده ايموت اعله كيف
كلش امبين أبو فراگ الثگيـل
يدّعي گبل المُغـرب الماعنده ناس
الدنيه كون اتخلص ومابيـها ليل

ماعايش الحيره .. بس الفگد ديره .. هاي السمه زغيره .. لليفگد اهــواي
____________________________

كلمات الشاعر / حمزة الحسناوي