المشاهدات: 2883   المدة: 16:34   الدقة: عالية
التصنيف: صوتيات دينية   الكلمات الدلالية: باسم الكربلائي
تعليق بواسطة ahmed.dh
ذكرى وفاة أم البنين (ع) 1441 هـ
قصيدة : هالله هالله
أداء : الحاج باسم الكربلائي
كلمات : الشاعر السيد عبدالخالق المحنه
المكان : العتبة العباسية المقدسة - كربلاء
======================
هالله هالله هالنعش من يحمله
إلا گلبه منچوي ابطف كربله
يعني يحمل واقعه .. بيها مقتل اربعة

يشترط باللي يشييع هالوفيه
كل حياته يبچي لمصاب الزچيه
شايل جروح على كبر الغاضريه
عنده غيره والعمر صفنة سبيه
هالنعش ما يحمله الما بي حزن
عالأقل فاگد اخو وفاگد ابن
خل يشوف بمدمعه .. بيها مقتل اربعة

مو قضية ضحت وصارت أميره
هذا حب حسين خلاها چبيره
هيه حرمه لكن تعادل عشيره
هيه ما متأسره بس عاشت اسيره
عاشت اهموم اليسر ويه الحرم
عاشت اعله المشرعة طيحة علم
والنعش چن مشرعه .. بيها مقتل اربعة

علمتنه الخدمة آخرها سلامه
والوفه لأهل الوفه هيبة وكرامه
علمتنه المو وفي ناقص شهامه
واليطخ راسه فلا ينصر أمامه
دنيه هذي والمواقف تنحسب
بالشدايد ينعرف منهو اليحب
والنهاية الموجعه .. بيها مقتل اربعة

يالتحفرون القبر وسعوا لحدها
حتماً الزهره تجي وتحضر ولدها
من تشاهد زينب ودمعه اعله خدها
يعني مأتم بالقبر هالليلة عدها
وآ حسيناً نادت بمدمع يهل
والزچية جاوبت يا أبا الفضل
خل تعود الفاجعه .. بيها مقتل اربعة

يا ابو فاضل ماتت امك من حزنها
ما تعيش الوالده الذبحوا ابنها
هالغريبة بكربله رادت وطنها
حسره ظلت تحضر تلفها بچفنها
هيه تدري ما يجيها المنذبح
بس تمنت حتى لو يرجع جرح
نظرة وحده لأصبعه .. بيها مقتل اربعة

من ابو اليمه إنذبح گطعوا هواها
والتفگدتك يا گمر ! تفگد ضواها
احنه يمك سيدي ونطلب رضاها
بجامعة حبكم يدرسونه وفاها
هالمصيبه الجمعتنه بحضرتك
من بچينه ادري نزلت دمعتك
دمعه والناعي نعه .. بيها مقتل اربعة

يا غيور بحضرتك نرفع ادينه
غيبة المهدي تره طالت علينه
سيدي هاج البحر واحنه السفينه
ننتهي لو ما ابو صالح يجينه
ليله ليله ساعه ساعه ننتظر
ما اجانه والكسر فوگ الكسر
والچفوف المُشرعه .. بيها مقتل اربعة