المشاهدات: 1940   المدة: 15:50   الدقة: عالية
التصنيف: صوتيات دينية   الكلمات الدلالية: فاقد الموسوي، Zahraa Al obaidi
تعليق بواسطة ❀ ♬ Ashk
يبنيتي رايح للذبح .. هاي آخر أنفاس العمر
باچر امتانيچ السبي .. رجليچ مو مالت جمر

يا ازغر ابنيه .. من هسه مسبيه

رجليچ مو مالت جمر
رجليچ مو مالت جمر


يبنيتي ماشوفج بعد .. ياروح أبوچ الدافيه
يبنيتي و وداعج صعب .. همزين شفتچ غافيه
تكسر الخاطر نومتچ .. يابويه نوم العافيه
باچر وره الخدر ركض .. جيب اليركـضچ حافيه

من يدون اخيامچ .. يركض اجدامچ

رجليچ مو مالت جمر
____________________________

يبنيتي باچر عالخيم .. لو غار عسكرها وعبر
ماتنحمل غربة وحبل .. سوط وهزل والباقي بر
عماتچ ابطرگ العبي .. رگضن لعد صوب النهر
محد تفگدچ يلتهن .. يتلاوذن عن النظر

حگهن يعوفنچ .. أغله الستر منچ

رجليچ مو مالت جمر
____________________________

اشسويتي بيه ابنومتچ .. مشتاگ أضـمچ للصدر
اتمنه اشبگبچ گبل .. لا يشبگ اعليه الشمر
خوفي من أهدچ ما اگدر .. لوداعچ وخاف أنكسر
راح امشي ياثگل المشي .. العايف ورا دنية خدر

راح امشي للحافر .. واشتاگلچ باچر

رجليچ مو مالت جمر
____________________________

بالخيل لازم انسحگ .. متواعد اوياهن وعد
اتمنه هسه امي ولو .. ماتحمل امدافع بعد
يالچنچ امي بكل وصف .. بس ما متعبچ بالمهد
شيبي اعله طولي ومن .. امر يمچ احس روحي ولد

راح اسبح ابدمي .. في ماالله يـ أمي

رجليچ مو مالت جمر
____________________________

كل مره وياي آخذچ .. بس هسه ارجوا المعذره
تدرين رايح للذبح .. وفياي ماكو ولا ذره
مو خوش نومه اعله الرمل .. والخيل لوهدت سره
يبنيتي مو مالت سحگ .. والحافر ابكبرچ تره

لو داسچ اتموتين .. وگبالي تطشرين

رجليچ مو مالت جمر
____________________________

ماودي اعوفچ وحدچ .. وانموت ودلي سوه
كل جرح يتشافه ويجف .. بس الهجر ماله دوه
من عندي باگت چم اخو .. چم ضحكة باگت نينوه
من امشي شأتنفس بعد .. يـ بنيتي غير انتي الهوه

ياحيرة الحيرة .. يا أمي الزغيره


راح امشي للحافر .. واشتاگلچ باچر

راح اسبح ابدمي .. في ماالله يـ أمي

حگهن يعوفنچ .. أغله الستر منچ

من يدون اخيامچ .. يركض اجدامچ

لو داسچ اتموتين .. وگبالي تطشرين

ياحيرة الحيرة .. يا أمي الزغيره

رجليچ مو مالت جمر


___________________________


كلمـات الشاعر احمد المـشرفاوي

___________________________

كــتآبة ~ Zahraa Al obaidi