المشاهدات: 4092   المدة: 20:01   الدقة: عالية
التصنيف: صوتيات دينية   الكلمات الدلالية: باسم الكربلائي
تعليق بواسطة يولان
نسوةٌ كرام، عن ألف حُسام
خل نشوف شنهو موقفها
بالطفوف الله شرفها
نسوةٌ كرام، عن ألف حُسام

اروي ياتاريخ خل نسمع
واكشف الحق للذي يطالب
وانخل ابغربيلك الواقع
فرزن المغلوب والغالب
واحچي موشرط الحچي قوة
مو شرط زلمه الذي اتحارب
عدنه موقف عن الف غارة
عدنه حرمه عن الف شارب

هاذي كربلاء .. شاهد الفداء
بالمثال .. نسوة نعرفها
عالرجال .. الله شرفها
_____________________

جملاً هالليل وافاكم
صاح ابوالسجاد سمعوني
ردو كل حرة لقبيلتها
ووحدي وي اعداي عوفوني
شاور اهله علي بن ظاهر
رفضت وگالتله يعيوني
انته واسي حسين بوريدك
وانه اواسي اخته بمتوني

انتو عالرمال .. واحنه عالرجمال
للقيود .. قدمت چفها
بالخلود .. الله شرفها
_____________________

بكربله الدم دمدم العسكر
وعالحسام انتصرت الچلمه
من وهب روح وإخذ شاهد
عن بسالة زوجته وأُمه
أُمه خلفه شدت احزامه
وهلهلت لمن نزف دمه
زوجته اول مره چانت
بالطفوف استشهدت يمه

دمها من يسيح .. يشكره المسيح
للجنان .. مريم اتزفها
بكل زمان .. الله شرفها
_____________________

هاذي بحريه بنت مسعود
للزچيه توفي ذمتها
صح عجوز وبالنسه ضعيفه
بس شباب انشوف همتها
صرعت اثنين ابشجاعتها
بينت قانون خدمتها
الما تحصل باشط اتسله
اتحارب ابعامود خيمتها

للسبط يهون .. المالُ والبنون
للإمام .. الروح تتلفها
بهالمقام .. الله شرفها
_____________________

ويه ربات الخدر حُرمه
چنها خرزه بسبحة الزهره
فضه بس من الذهب اغله
جاريه بس بالفعل حره
ركبت زينب على الناگه
من بقه العباس عالغبره
عاونتها اعله السبي وضيمه
وشاركتها ابرحلة الأسره

عنها شرد أگول .. فضة البتول
بالولاء .. علي وصفها
من النساء .. الله شرفها
_____________________

وبوقت بي شحت الكوفه
والزلم موسومه بالفشله
ماتفيد الموعظة ابميت
البي عمه ماتنفعه الكحله
هناكه زوجه ميثم التمار
ويه طوعه رفضت الذله
سكته دفنت مسلم وهاني
للشهامه موقف اتسجله

ابدفنة السفير .. تنحسب نصير
ماينام .. ذله طارفها
بهالوسام .. الله شرفها
_____________________

ويه جسم الـ عالترب عاري
بلا دفن انصاره والاخوه
سجلوا بني أسد موقف
والفخر محسوب للنسوه
اسديه والنعم منها
ولا عجب بنت الاسد لبوه
حيهم اتنادي ابعشيرتها
وحشمتها ابچلمه النخوه

تصرخ وتريد .. تدفن الشهيد
إلها عين .. دمعة تذرفها
بالحُسين .. الله شرفها
_____________________

بكل زمن نسوة فخر تلگه
بكل عصر للذمه وفايه
واللي رفعن راية النصره
للحشر ماتوگع الرايه
الويه زينب عالهزل ناحن
اليوم نصبن مجلس قرايه
واللي راحن بالسبي وياها
اليوم إجــن وياها مشايه

تنتظر يحين .. يوم الاربعين
بهالمسير .. زينب اتحفها
وبالأخير .. الله شرفها

_____________________

كلمات الشاعر : ميرزا عادل اشكناني