يــــامسؤول بأسم الذين فقدتهم سفراً او موتا

فرق بين اليجوع وهو جوعان عن ذاك اليجوع وهو شابع

وفرق بين السكن في اعله القصوروالبيتـــه رصيف وبابه شارع

وفرق بين الشرد من هدت الجيش والاستشهد لأن باقي يدافع

مااريدك تجي وتگول ضحيت كلمة تضحيه صارت قديمه

ولااريدك تجي تحچي البطولات لان ماكو بطل بعد الهزيمه؟!

وناسك شافتك لا تظنهه عميان وضد مجهول لا تسجل الجريمه

ناسك تفتهم ولهذا ما تريد على العاده ترد ترجع حليمه

وملـّت تنتظر مو كافي تنظيرعلى الدمعات شتعلم اليتيمه

ملـّّت تنتظر وتريد تغيير لأنهه اتغيرت ما هي غشيمه

واحلام الشعب عنهه انته مسؤول واذا مو گدهه ليش تگول حاضر

احلام الشعب تحتاج تحقيق لان كافي البعد يوميه باچر

وعاين عالوطن ماهزك الصارولا واحد عليه مكسور خاطر

عاين عالوطن صاير حجابات وبس عوزه بعد نبنيلـه ساتر

ومليانه الشوارع بس شعارات والله يعين حيطان المدارس

وحارس مانحط بطلنه عالباب لأن حارسنه هو يحتاج حارس

واذا مهره الصدگ فارسهه چذّاب لأن ياهو اليجي گال اني فارس!

ضرغام العراقي


الى متى ..

أبوالاحـــــــزان

راسب بالفرح من دون الاوطان
وناجح بالحزن يا موطني شبيك

مو انته الحضاره وكان ماكان
يلمعلم الدول مو تمتحن بيك

چاشنهو التغير وانته عنوان
واشباه الزلم گامت تقرّيك

رسيني اعله برك جيت غرگان
غرگان بسؤالي بالله يرضيك

ميت يرثي ميت حيل حيران
اذا السياب انته شلون اجاريك؟

ومن قوس القزح باگوهه الالوان
وخايف يا وطن باچر اجدّيك

وطن خيرات لكن شعبه جوعان
واذا جوعان شعبك گلي شنطيك؟

وياابو النهرين ليش وباقي عطشان
ووشّلت الدمع چابيمن ارويك

وعلى كثر الجثث مالاگي دفـّان
شلت الخارطه وبيه لغطيك

عراق وبس طلب من ابنك فلان
أبو الاحزان تقبل راح اسميّك؟

لأن انته وطن في هيئة انسان
ولهذا السبب هم راح اوصيك

تگدر تنتفض وتعيد شعلان؟
فكّر ياوطن بلك الله يهديك
بلك الله يهديك ..

ضرغام العراقي


تداعيات وطن " القاهره تكتب وبيروت تطبع وبغداد تقرء "


رايد وطن من صدگ ... بس كون الگه الصدگ
حتى انه اريدن وطن

ورايد شعب مو شعب ... ياكل ويشرب فقط
رايد شعب ينتفض لو مر عجاف الزمن

ورايد بعد وشكثر ... احلام من الزغر
كل يوم يطلع شمر وليهسه متحققن

والماأريده نعم ... راح انه اگوله بألم
والصوت هو القلم والورقه اسمع اذاً :

مااريد بابي تدگ تحرجني ما عندي
ومااريد عالارصفه الگه الصبح ولدي
ومااريد اعبر جسر والگه مره اتجدي
ومااريد ابن الوطن يحلم لبِس جندي

ومااريد فارس چذب مليت من الچذب
عبرن عليه گبل بس هسه ما عبرن


ولاتبچي ما اقتنع خبره صرت بالدمع
مكسور عدنه ظلع ويگلي لا عثرن

وعندي بعد بس طلب ... عاجل لكل العرب!
اذكر عباره أمس ... ظلت تحز بالنفس

" القاهره تكتب وبيروت تطبع وبغداد تقرء "

ما تكتب القاهره وبيروت ما تطبع لا احنه مو فقره
بغداد تكتب بعد ...
بغداد تطبع بعد ...
وكل الشعب يقره وكل العرب تقره
كل العرب تقره

ضرغام العراقي

غداً...

غصبن عالحزن

تگضي وداعتك وسوالف تصير وباچر يا وطن يرجع فرحنه
موعدنه المهم لو متنه وانعيشبس انتهالمهم كل احنه صحنه
ما ننغش بعد علمنه الدروس صح قاسي الزمن لكن نصحنه
علمنه نعرف الزين والشين ياهو الطيب وياهو الجرحنه
وما نغلط بعد ونصير حيطان واحد يكتب وثاني مسحنه
وما نقبل ابد نصبح توابيت حصتنه الدمع صافي ربحنه
وقطعاً ياوطن عايش بالگلوب يعني اگبالنه وين احنه رحنه
ولد الملحه گلي شلون ننساك غزر بينه ياموطن ملحنه
ويامحنه التجي تلگانه الچفوف ذبحنه الميم صارت النه حنّه
وذبحنه المستحيل وكلمة شلون بس حبّك فقط هو الذبحنه
ونزرع بالأمل حتىّ يحصدون عدنه اطفالنه باچر فلحنه
ويطلعلك فجر من اريدك تحير وليلك ينجلي والله بصبحنه
وترجع ياوطن من احلة الاوطان وغصبن عالحزن يرجع فرحنه

ضرغام العراقي

عتباعتذارحب

ســـاكت

ساكت ياوطن والحرگَه تاكل بيك لو خايف بعد والسكته من خوفك

من حرب الحرب جبنه العمر وياك من اكل الجثث ما ينترس جوفك

مابيك الذنب گول الذنب چا وين يمكن نعتذر لو نفهم اظروفك

چنت المدرسه وبيك الشعب طلاب وبس دگ الجرس شو فارغه اصفوفك

تقبل ياوطن؟يرضيك هذا الحال ناسك للأسف تتراكض اتعوفك

وتقبل ياوطن؟ شبانك الحلوين تتغرب غصب تحرمهه من شوفك

جاوب لا تظل ساكت يـبو الثورات عشرينك بعدهه اتعيش بطيوفك

من طور الحزن ملينه ما ملّيت چاطور الفرح ما تعزف ادفوفك

من اريد الفرح بس كون اريدك سيف موعيب بغمده اتنامهه اسيوفك

وبايگ ما صرت ما خاف من جلاد مو هذا شعارك هذه معزوفك

چاشنهو التغير؟يا عراق شبيك ثار حسين ذمه بشيبة ازلوفك

شعبك من عطش رادك مثل عباس يعني حسين شعبك وارضه اله اطفوفك

لكن للأسف ماكوا مثل عباس ومانوصل عشر ياحسين لحروفك

ونعتب ياوطن من حبنه الك والله شفناك النهر عطشان بجروفك

ومن انصحك لأنصدگنه كلنه اخطاء يا بيت الكرم نتسمّه بضيوفك

اصفن ويه نفسك راح تعرف زين لو ما تنتفض چاضاع معروفك

عذراً يا وطن بس ثور حتى نثور لو تگضي العمر والقيد بچفوفك

تنويه :
مانقصدوطن يعني الوطن بالذات بعيون البشر هم موطن انشوفك

ضرغام العراقي


ابومحتاج


الاسم : أبو محتاج الزمان : بعد منتصف الحلم
المكان : وطن اسمه العراق العنوان : الحاجه ام الاختراع


* محتاج مثلك ( عَلي) مااريدن اهل الفيل

ومحتاج تمطر علممو تمطر ابسجيل

ومن فكرت يا شعب مستقبلك بي تعب عقلي وگلبي لعب

حرب ودمار وقتل وشلون يطلع جيل؟!

* محتاج واهس طفل وتگول طفل الصين

لو حل من المدرسة مايركض اعله الطين!

ومن زغرة واعي وفكر واخلاق عنده ودين

ولوجاع يقرة اكتاب لويسمع الزرياب

ويسأل منو السياب لامو منو استالين

* محتاج طيبة گلب مزروعه بين الناس

وياريت كل البشر مافاقدة الاحساس

واتمنة اشوف الوردينشم ولا ينداس

وترد سوالف امسحب ومحنة وهمس

وتطلع علينة الشمس وچف الصدگ ينباس

* محتاج صاحب اخوا بس كون الي محتاج

مااريدة كلّش نبي ولااريدةهم حجاج

ولوصار مرّه ملك افرح يصير الملك

لكن يهم بالشعب لامو يهم بالتاج


* ثاريني عايش حلم ومن واقعي منهزم

وضحكوا علي للعلم وطلقوا عليه اسم

سموّني أبو محتاج .. من كثر ما محتاج


ضرغام العراقي


واعراقــاه ... أسطورة ألألـم العراقي


طبعك ياوطن ماترضه بالشيـن
بس طبعك تغير ياوطن هسه

چفك شو كَبل بعدال چفيـن
بس هسه الاصابع حتى مو خمسه

وناسك تحتضر والموت عالباب
شمتاني بعد ويعرفــك بنفسه

بـغدادك نخت صاحت عراقاااااااااه
تالي تندمت عالواو چه خرسه !!!

وننسه ياوطن متكَلي وشلون
كل ظنك سهل من نقتنع ننسه ؟؟؟

ننسه چم يتيم وارمله بيك
لو ذاك الفقير الفجروا عرسه

بسك طيـبتك ماتنفع اليوم
من طبع الاسد افعاله هم شرسه

وماتدري المثـل ياموطني شكَال
ينفع نفسه كل من ياكل بضرسه

محتلك حقد شايلك اسنين
وكل ما يذكرك وذكره بأمسه

وعميان الدول ما شافتك زين
والاعمه طبع مكروهه اله شمسه

ولا انته طفل مايعرف يثور
ستالاف عمرك ياوطن تنسه

مو حتى الظهر مل التوابيت
ودخان البنادق كَمنه نتنفسه

مليت انتظر حس بينه وارجوك
بس كَول شوكت ياموطني تــقسه


الشاعر الديواني الكبير
ضرغام العراقي