مثل النذر ذكرك لازم نسده
وبعد بالصفنه احذرك موش تتعده

جويتك واعرف الجدر فوك النار
من تجويه يطلعلك شنو العنده

ورحت مثل التراب اليمشي وي الريح
من يكضي الهوه يحتار بالرده

مو كل الربه يرجع واخذ عصفور
بيدك خله يربه من العمر مده

تشوفه مكيف ع العشره بس جذاب
واذا رايد تصدك فنك تهده

وكتلك روح اعرفنك ترد مجبور
الماي الرايح يرجعونه بالسده

جنت ادري الشراع يكسره زود الريح
وجنت ادري البلم بالنص ويترده

نحس ماتنشرب ماي بوسط محرار
وعليش افتحلك المحرار تتبده

وابشرك جبرتهن بعد ماكو كسور
وطميت السوالف وحده صف وحده

الهوه لوشال خشمه اطيه كفه وماعيش
شايل كلب منجل ماعرف ورده

اعرفك من جنت بالدرب ماشي وياك
وبعذر التعب تكعد وتتهده

بس صدكني اعرفك ماجنت تعبان
تكعد بالطريج وسيفك تحده

الشاعر احمد الصلابي