ياطويلين العمر هذي قصة حدثت في الفترة مابين (( 1900_1895 ))
يعني مافيه سنة مؤكدة ولكن هي في هذي الفترة
.................................................. ...........
.................................................. ...........
ياطويلين العمر
جو عشرين فارس من قبيلة الرولة بقيادة فارسهم فواز الرسن ( خيال المطاليق)وكانو رايحين شمال للجوف وبالطريق شافولهم واحد يسوق الذود
والحلال ... وطمعو فيه الرولة وقالو هذا من نصيبنا .... وفعلا استولو على النياق والحلال كلها
وكان راعي الحلال رجال شمري ينقال له ...ماجد الشمري وهو من سنجارة
المهم جاء انت يا ماجد يبي يمنعهم لكن الكثرة تغلب الشجاعه ورضخ للامر الواقع
وتمر عليه الايام وهو يتحسر عليهن
وقال مالي الا ارتجي الله ثم خوياي يرجعون لي الحلال
وماجد كان له خوي بارض العراق وهو معروف بالشجاعه اسمه (( حمادي بن مطرود الحسين القشعم ))
وهو من بني قشعم (جشعم) ومن فرسانها المشهورين
وماجد كان يعرفهم من ايام كان صغير بحكم ان ماجد ولد في العراق وخواله بني قشعم وتربى معهم
ولما صار رجال ابوه ارسل له انه يجي يعاونه . وهذا كان اخر يوم شاف فيه خويه حمادي

المهم فكر ماجد بطريقة وقال مالي الا الشعر لانه يوصل بسرعه ويعلمهم بحالي (( على رغم ان ماجد لم يكن شاعر قط ))
قال وهو يتحسر على حلاله اللي راح وهو يخاطب ابن اخوه سعد لعله يوصل لخوياه القصيدة :

قال الذي ما قط نظم قوافي ...... تبرا حالتي يا سعد كل الطواريق
وجدي عليهن روحن بالفيافي.......وجدي كما اللي فارقه عز المخاليق
راحن وانا بي رجتن لها خفافي.....يا عزوتي وين اللي يفك المعاليق
يوم الرويلي ساقهن بلا انصافي.... وخلا الوسيعة بصدري كلها ضيق

الى ان يصل لاخر القصيدة وهي طويلة وتعذروني عن كتابتها لاني نسيت بعض الابيات
ويقول في اخر ابيات منها :

علام اخو وضحه بحالنا ما يرافي ....... علام راعي الشقحا خيال المسابيق
هذا قصيدي موافقن كل الاعرافي....... ما ارتجي غير راس خيال المطاليق

وخيال المطاليق مثل ما ذكرت هو كبير الفريس اللي خذو حلال ماجد الشمري
المهم
ويروح انت يا سعد للعراق يبي يوصل العلم واللي صار لعمه الى خوالهم القشعم (الجشعم) وماجد ابن مريجيج ظل يتحرى الفزعة اللي تاخرت كثير لان سعد كان صغير بالعمر (( فاهي مثل مايقولون قبل )) وما ييعرف وين منازل خواله
وتمر اكثر من عشر ايام الين ما وصل سعد لخواله
وهو يبلغ راعي الشقحا باللي صار لخويهم وقامو يتعزوون كلمن بعزوته
قال حمادي اخو وضحه نرسل له قصيدة تصبره الين ما نتجهز للرد على الرولة
حيث قال:

يابناخي . عمك علينا حقن واعترافي.....عز الرجال لا بغو شوف الصديق
وان ما خذينا حقنا بضرب الاسيافي.... والا ترا ارواحنا صارت مراهيق
وش عذري من الناس لا قالو سنافي.... وخوي يشتكي جورن ومضاييق
فواز راسك الا اقطعه بين الاكتافي.....ويرد ذودك يالخوي زودن له الريق

وهي ايضا طويلة ولكني كتبت اللي حافظه منها
بعدين قال والله ما انام ليلي بين ربعي ..لابد ااروح لماجد قبل القصيدة
(( شوفو ياناس الفزعه ... يسابق القصيدة ... الله اكبر ))
ويروح راعي الشقحا
ولما وصل اطراف ديرة فواز ابن رسن تحايل على ربع فواز
وتغافلهم وذبح الراعي اللي يحرسهن وساق الحلال ورده لخويه ماجد
ولما شاف ماجد حلاله رجع له وشاف الرجال اللي ردهن له قال والله انك راعي الشقحا
رد عليه راعي الشقحا ابشر بعزك وجيتك قبل لا القصيدة تجيك
وتجمعو كل الخويا عند ماجد ووصلو فرسان القشعم (الجشعم) جماعة الشيخ حمادي بن مطرود الحسين ابن قشعم
ووراحو يطلبون ابن رسن الين ما صارت الوقعه بينهم وانتهت بخسارة الرولة لفارسهم فواز اللي ذبحه حمادي
واخذ حمادي تقريبا نصف حلال ربع فواز وساقه لماجد تعويض له
................................
...............................
ياناس شوفو شلون يتسابقون على الفزعه


الشيخ حمادي : هو الشيخ حمادي البيك راعي الشقحاء بن الشيخ مطرود عنبر العربان بن الشيخ صالح بن الشيخ حسين شيخ مشايخ العرب بن الشيخ شبيب شيخ الجشعم بن الشيخ حبيب بن الامير صقر السعد بن الامير حمود المحفوظ بن الامير كنعان راعي التوثه بن الامير أبي طالب امير امراء العراق بن الملك العربي ناصر صاحب الكرامات بن الامير مهنا بك بن الامير ثامر امير العرب بن قشعم (جشعم) امير قبيلة غزية