قَبل فترّة من داقرا بـصحيفة الحُقوق فكان أكو حق الصاحب
فتعلمت أنو الصدّيق إله حَق عليك وكُلشي إله حق عليك معناها حتتحاسب إذا متوفيّ هالحق وتظلمه...حق صديقك أنّو ما تتركه وقت حزنه وقت فرحه تكون سنَد وياه بكُل أوقاته وهالحياة كُلش صعبة وبيها كومة مطبات وعثرات فإذا أختاريت صديق لحياتك فإختار الي متهون عليه والي وقت توگع يوگفك بلا ميگول للناس إنت منهار ومكسور...حق الصديق أنو تتحمله وقت يعصب وقت يكون مو طايق روحه إحمل أخاك سبعين محمل إحنه مو ملائكة وأكيد إحنه هم نغلط ونزعلهم هوايه مرات ..حقه أنك متسيء الظن بي أنو وقت تسمع شي محلو عنه تروحله تگوله هيچ سمعت وخلّي ثقتك بي مو بالكلام.. إختاروا أصدقائكم بطريقة ما تنتهي أختار الي يلمس روحك ويريدك بأحسن مكان وبأقرب درجة لرب العالمين .
...
والصداقة نِعمة كُلش كبيرة علينا بس تنقلب نقمة إذا اختاريت غلط وإذا ما تصرفت صح
بالأخير الحياة كُلش صغيرة ويجي يوم ونروح كُلنا
أختار الصديق الي حيظل يدعيلك من عايش ومن ميت
لا تطلب من الناس اكثر مما تنطيهم
تعلموا تسامحون هوايه للشخص الي يستحق لأن إذا الله بجلالته وعظمته ديسامحنا على أغلاطنا احنه منو ونتسلط على العالم
أمشوا يلا أيّ واحد متزاعلين خلي يتصالحون ترا محد يعرف باجر شيصير ولاتنتظر تندم على شي ما يرجع
(وأخيرًا تدرون آني أسوء صديق بالعالم)
دائمًا مقصرّة ومعندي وقت فلا تصيرون مثلي وخلوا دائرة اصدقائكم محدودة حتى تگدرون تهتمون بيهم.
رد مع اقتباس
المشاركة الأصلية كتبت بواسطة انثى مخمليةة
