معذور إذا ما حاسْبچ عَ البشر!
گالولها: ٱش كاتِبْ‌لِچ؟ وْ دَنِّگت
وْ گالولها: لا تستْحين؛ وْ بِچَت
وْ گالولها: مسموحْ‌لَه ٱش ما كتب
هِيَّ ٱنتِ آيه مْن الله و تْنَزِّلَت!
معذور إذا ما حاسْبچ عَ البشر!
حوريّه حَطّ بْصفّچ و نَشّزت!
من شامْتج للّيل هِندس خَذَوْا!
نجمة(ت) سِمَا الله عْلىٰ الخدود وْ ضُوَت!
حتّىٰ الشّمس عينين عِدها گبل!
من باوعتْ‌لِچ، عين منها ٱنْطفت!
گوليْ‌لْنا ولفچ ٱش عَنِّچ كِتَب؟
بيْهْ(بي) ندري شاعر؛ ما نْصدّگ سِكت
ساعتها أحِسّ بُركان بيها ٱشتعل
وَشَّل صبرها وْ بالدّمع جاوبت:
"والله ما كاتِبْ‌لَه عنّي حرف."
بس راح أگلّ للنّاس هيچي حچت
وْ گالتْ‌لي: شِتگلهم؟ وْ ما گِلِت
وْ گالتْ‌لي: ها؟؛ بس چِنْت أفكّر شَرِد؟
وْ گالتْ‌لي: وينك يَ الْ بْعِزّ الهوا!
وْ گلتْ‌إلها: ها؟ يَ العافيه الْ تِنْحِسِد!
گالت: شَگِلْهم من سمع بالحچي؟
گلتْ‌إلها: گولي السّالفه الْ تنحمد
گولي‌لهم: "ماخذ أطباع الفِلِح
من يحلىٰ زرعه تْصيبه رجفة(ت) بَرِد!
بس ما يْگِلْهم: زرعي طيّب ثَمَر
يبدي المدح بالزّرع من يِنْحِصِد."
ماريد أوصفنّچ وصف ينّسي
رايد الْ بيْهْ(بي) يحچون ولد الولد!
كون مْن أسولف سالفه، تنحفظّ!
ماريد أسولف‌لِچ سوالف سَرِد
والله كل ماريد أحطّْ‌لي شطر
تعرض عْيونچ و الزّرع و الورد!
صادق الجهلاوي
رد مع اقتباس
