آمال ابوك ودعوته والگلب وياك يل أكبر مِشَن للحرب
آمال ابوك ودعوته والگلب
وياك يل أكبر مِشَن للحرب
------------
مثل الگمر واگف يعدّ النجم
ايخيِّر فؤاده ابّين شهمِ وشهم
وقرّر يضحّي بأغلى واقرب إسم
من مهجته وهذا الخيار الصعب
------------
ما يصعب اعلى حسين أصعب أمُر
شما تكبر جروحه يعينه الصبر
للدين يفدي الأغلى من العمر
عينه اعلى وجهك والمدامع تصب
-----------
يا علي ولمّن ودعتْ خيمته
مو من خيامه اطلعِت من مهجته
من ودّعيته حاطك بدعوته
وگلبه الذي لعمرك رفيق الدرب
-----------
من راحت الآمال ظل الوجِد
يدريك من ترحل بعد ما تِرِد
شافك مبين اهل الغدر منفرد
يل أكبر تولّوك طعن وضرب
----------
بل معركه جيوش العده اتولّتك
بسيوف ورماح ونبل حاطتك
يل اكبر ولمن هوت جثتك
وشافك ابوك موذر اعلى الترب
-----------
شِهگت جروح حسين دمع وضمه
والكون حگه اوياه يبچي دِمه
والأرض تتزلزل وحتى السِمه
حگهه اويه دمع حسين تمطر شُهُب
عقيل الكاظمي
رد مع اقتباس