صعبه اشوف الذابحك صار المحامي ، شعر شعبي حسيني
امشي مكسورة جنح
روحي ظلت عالرمح
وعالنهر مات الصبح
بالحبال جفوفي و ابعثلك سلامي
صعبه اشوف الذابحك صار المحامي
يهون كلشي حتى لو حرگة خيامي
الهظمه الجبيره يخويه تموت ضامي
ريت ما يبقى ضمه
وامسح براسك دمه
و دمعتي لا تنمسح
.................................................. ....
گلبي ما ينطيني عالشاطي اعوفك
تعودت أقرب من خيالي اشوفك
هسه طايح والنهر كله يطوفك
كافي طولك رد اليه بلا جفوفك
والعتب كله سكت
عازتك خويه بقت
يمكن بجرحي ملح
.................................................. ....
ردت امد ايدي واحظنك للمنيه
لجن من سياطهم وجعتني اديه
صح أريدك لجن لا ترجع اليه
خوفي ما تتحمل تشوفك رقية
طفلة ما عدها علم
حسين راس بلا جسم
ظل گلبها منذبح
.................................................. ....
سبي ظلمه وحشه والقصة أليمه
اني من بعدك اروح بدنيا هيمه
عشت بعيونك وهسه بالهظيمة
يا گمر بس السمه ظلتلي خيمه
كلشي ظلمه بلا گمر
خاطر عيوني انكسر
والألم ما ينشرح
.................................................. ....
طفت نار الخيمه بس ناري متطفه
من عگب وجهك اشوف وجوه صلفة
عيوني بديار الغريبة شلون تغفه
السوط من كل جهة ما الحگ اشگفه
خويه والموقف صعب
گبالي طفلة تنظرب
ادري راسك ينجرح
أحمد واثق العيساوي
رد مع اقتباس
