ثقافة قانونيه
خلي انطيكم استشارة قانونية مجانية حتى لا تصيرون بمأزق الشاب البابلي:
١- حتى تتجنب الايذاء الجسدي من ضابط التحقيق حاول قدر الامكان تتصل بمحاميك، واذا ما گدرت حاول تتصل باهلك يبلغون محاميك، واذا هم ما گدرت وانضغط عليك بالتحقيق اعترف بأي شي يريدوه منك لا تخاف، او حاول تعترف باشياء وهمية ما الها اي وجود، (سرقة دار عمك مثلاً)، اعترافك امام ضباط الشرطة ما اله اي قيمة قانونية نهائياً.
٢- الضابط ملزم يعرضك على قاضي التحقيق خلال ٢٤ ساعة، من توصل يم القاضي جاوبه بكلمة وحدة بس: اريد المحامي مالتي وهذا اسمه ورقم تلفونه، اذا گلك اكو محامي منتدب والدولة راح تدفع اتعابه گله اني متمسك بطلبي بحضور وكيلي المحامي فلان وما انطق اي كلمة الا يجي.
٣- في حال شفت نفسك ما تحتاج المحامي، تراجع عن كل اللي گلته امام القاضي، وبلغه انه كل اعترافاتك جانت خوفاً من التعذيب. انكر كل شي حتى اذا گلك هذا عنوانك صحيح كله لا غلط.
٤- عادةً قبل ما يوديك الضابط للقاضي راح يگلك، (انت ما عندك شي شغلتك سهلة واقوالك من صالحك ويومين تلاثة وتطلع انشالله) هاي الجملة لا تصدگها ابد، لا يقشمرك، لا يقنعك، لا يضحك عليك، لا تثق بالضباط ابد، ولا تخاف منه اذا هددك بالتعذيب بحال نكرت كدام القاضي، لان صدگني بعد كلشي ما يگدر يسويلك.
٥- اذا تعرضت للتعذيب حاول تحفظ اصوات او اشكال اللي عذبوك واطلب الشكوى عليهم اول ما توصل للقاضي، واذا اكو اثار على جسمك حاول تحافظ عليها.
٦- لا تقبل اي احد يعتقلك بدون امر قبض، ما دام انت ما مرتكب جريمة مشهودة، ولا تسمح لاي احد يدخل لبيتك يفتشه بدون قرار قاضي وحضور مختار المنطقة.
احفظ هذا الكلام مثل ما تحفظ اسمك، وضروري جداً يكون عندك محامي جاهز دائماً، وتذكر : كلما كان دخول المحامي مبكر بالقضية كلما فرص نجاتك تزيد
وهنا لابد أن ننوه بانه هنالك الكثير من ضباط التحقيق مهنين ونكن لهم الاحترام والتقدير ولكن ما ذكر أعلاه لمن يتبع سلوك غير مهني مع اعتزازنا لكل ضابط تحقيق شريف.
منقول
رد مع اقتباس
