#المعدل_التراكمي
- شنو هو المعدل التراكمي ؟ وشنو يفيدنا ؟
- اهم نقطة لازم يعرفها الطالب بالجامعة هي المعدل التراكمي
- مهم تعرفه لأنه شكد معدلك التراكمي عاااالي شكد نسبة تعيينك تصير قوية وتكون مفضل بالدراسات العليا ايضاً.. يفضلونك بالتعيين والدراسات العليا اذا المعدل التراكمي مالتك قوووووي.
زين شنو هو وشلون يكون ؟
المعدل التراكمي هو محصود تعبك بالكلية مالتك خلال كل السنوات ومراحل الدراسة بالجامعة .
زين شلون ينحسب ؟ هسه افهمك
خل افترض انت طالب كلية ( ٤ سنوات )
فاكو بكل مرحلة معدل يخصها :-
المرحلة الأولى :- ١٠ ٪
المرحلة الثانية :- ٢٠٪
المرحلة الثالثة :- ٣٠٪
المرحلة الرابعة :- ٤٠٪
اذا تجمع المراحل كلها فيصير المعدل :- ١٠٠٪ تمام ؟
فإذا أنت معدلك بالمرحلة الأولى ٨٪ من اصل ١٠٪ وبالثانية ١٧٪ من اصل ٢٠٪ وبالثالثة ٢٧٪ من اصل ٣٠٪ والرابع ٣٥٪ من اصل ٤٠٪
راح يجمعون معدلاتك بالنهاية فيصير :- ٨+١٧+٢٧+٣٥ = ٨٧٪ هو هذا الناتج بالنهاية يسمونه المعدل التراكمي للطالب ، وشكد عالي شكد الك فرصة اقوى بالتعيين ، لأنه اذا اجت فرص تعيين فراح يسحبون اعلى المعدلات التراكمية للطلاب ويعنونهم ، فشكد معدلك عالي شكد فرصتك اقوى بالتعيين+ الدارسات العليا.
توزيع النسبة المئوية للمعدل التراكمي للكليات الي دراستهم ( 6 سنوات) :-
المرحلة الأولى :- 5%
المرحلة الثانية :- 5%
المرحلة الثالثة :- 5%
المرحلة الرابعة :- 15%
المرحلة الخامسة :- 30%
المرحلة السادسة :- 40%
توزيع الدرجة للكليات الي دراستهم 5 سنوات :-
- الاولى :- 5%
-الثانية :- 10%
- الثالثة :- 15%
- الرابعة :- 30%
- الخامسة :- 40%
اما دراسة المعاهد عبارة عن سنتين :-
- الاولى:- 40%
- الثانية :- 60%
رد مع اقتباس
المشاركة الأصلية كتبت بواسطة تشيللو
