معقولة اخو الـمـﭼـتول يمسح سيف ﭼـتالة
" معقولة اخو الـمـﭼـتول يمسح سيف ﭼـتالة"
تعنيتك بـ سـﭼـة تضيع بيها ادموع المسافر
تطشرني وألم روحي واگوطر والوعد باجر
دليلي بسـﭼـتك غيمة ..
يبعثرها الهوى امعاند واكضن خيطها من اخر ..
بالمعالج وصلت بخاطري المكسور
ضنيتك ﭼـريم وتجبر الخاطر
حسبتك مثل الأول روحك رخيصة تنيم الليل وتساهر ..
حسبتك تشتري الشاريك
شوگ البيك ما يبرد .. حسبتك قافية وشاعر
لڰيتك موش ذاك انت ولا ضل اعله الاول گلبك الطاهر
لگيتك حاضن الشمات ..
وبـ روج الگلت والڰال تغرب بيه وتحادر
واجيتك صيدة عمية لحضن نتّالة
الشبوط اليگيش الطافح بذيله تعنه اعله الشبـﭻ عنوه يدور العافية بجاله ..
المضيف الفارش اجفوفه لجدم الجاي
اجاك امشجبن ادلاله ..
كلت بيك الرشد .. گوم وتزيح الضيم وانت التعرف الحاله..
يـ لن ايدك تـﭼـيل الضيم هي الصارت اعله الضيم ﭼـياله
هجم بيت الزمان الـيشل جف حاتم يگمطه اشباگ بيته اشباگ بحباله
وهجم بيته اليحش العنبر بجفه ويحير بلگمة اعياله
وهجم بيته التدور الرحه بجفوفه ويرد عوزه اعله السحاله ..
واجيتك هسه من تالي اريد الحك اعله الوشاله
لكيتك فوك سطح الفوگ شيجيبه عليك العثرته اذياله
معقولة اخو المجتول يمسح سيف جتاله
ورديت بطريج الجابني مهضوم .. والناس البعيدة تكول هنياله
شگل للوادم احتاريت اهم للنشد بطاله
اكلهم لو انام اعله الجرح ..لو انسى من خلي
لجن شنسى جرح جرحين شنساله
اهو العينه توﭼـد الدرب شيجيبه اعله حفر الذيب وشماله
معقولة اخو المجتول يمسح سيف جتاله
معقولة السمج بطران يرضع شاخة الفالة ..!
كريم الجسار
رد مع اقتباس
