بسم العلي الواحد مني الى الوالد
عن كل حرف مكتوب دمع الوجع شاهد
بعد التحية لحضرتك
يابوية طالت غيبتك
ليا حد اناطر رجعتك
بشرني بأخبار الخيم
والاكبر و راعي العلم
گلهم عليلة من الهجر
كاتلها شوگ أهل الشيم
منتظرة ترجعلي بهلك
بوية و فرشت الدار الك
رد يمي مشتهية اخدمك
بالغربة يا بوية شِلك ؟
طك كلبي لعيونك رد بوية لضعونك
مو زينه بفراكك يغالي
ريت بمراسيلي ترهم و أرد حيلي
جا تبجي يابوية على حالي
هنا يالعفتني بلا نشد
وصلت غربتك للچبد
لدارك ترد لو ما ترد
حُسـين يابوية ..(٢)
ـــــــــــــــــــــــــ ـــــــــــــــــــــــــ ـــــــــــــــ
ما فارگ ظنوني جرح اهلي و ظعوني
بمرسالي ما بيّن شكد باچية عيوني
شكم رسالة بحسرتي
اكتبها لاچَن دمعتي
تطيح و تخرب كتابتي
شبيدي الجفن ما يمتنع
گوة على عيني تصب دمع
كلما اريد اكتب الك
خدر العقيلة بيا وضع
لاچمني من هاي الگلب
و عيشني لخيامك رعب
معقولة جا صدفة الدمع
يابوية واهلك مو غرب
ما تقتنع روحي وخدرك سبب نوحي
وحالة عليلتكم عجيبة
يابوية و آنه انحب اكتب اسم زينب
وعيوني تقراها الغريبة
بس لا صدك و اتغربت
ويَ الكفلها اتفارگت
و وحيده من دونك بقت
حُسين يابوية .. (٢)
ـــــــــــــــــــــــــ ـــــــــــــــــــــــــ ـــــــــــــــ
ليلية بأحلامي طيفك يمر ضامي
ويفزز جروحي من جدي حد هامي
مذهولة افز من نومتي
و اركض يبوية بحسرتي
بهدومك امسح دمعتي
و اغفى على هدمك و العطر
واسمع ركض خيل الذعر
و صوت المرة يصيح بألم
راح الخدر راح الخدر
هابوية گلي اني بوهم
گلي الخيم نفس الخيم
ودولي من عندكم خبر
گلولي ما طاح العلم
گلي الخيم بيها كافل يحاميها
و حسيني ما عطشت خيامه
گلي انت مو ضامي و العلة بأحلامي
و اهل الخيم كلها بسلامه
شيكلفك المرسال الي
خل تغفى عيني يالولي
تأذيني احلامي بأهلي
حُسين يابوية ..(٢)
ـــــــــــــــــــــــــ ـــــــــــــــــــــــــ ـــــــــــــــ
ما تنگضي اهاتي و همّي و معاناتي
الا و يرد سالم ضعني ويَ عماتي
رغم الجروح ابقى انتظر
يم بابي صبحية و عصر
لابد ترد من الهجر
لابد يجي اليوم الي بي
يرجع ضعنّا الطالبي
بس انه خوفي يرد عليّ
مو هوهَ من ضيم السبي
و شما تريد أُبطي المهم
ترجع حرمنا ويَ الزلم
ورايتنا كدام الخدر
تمشي و يرف بيها الشهم
مابيه أصد ضعنك بوية و أدورنّك
و ما الگه وياهم عيونك
كلشي اكدر لحمله الا انتَ مو سهلة
مو هينة و أتنفس بدونك
يبقى المرض بية أحتمل
عمرين أحمله و ما أمل
بس كونك انتَ ترد عدل
حُسين يابوية ..(٢)
ـــــــــــــــــــــــــ ـــــــــــــــــــــــــ ـــــــــــــــ
- مني الى الوالد
- الملا :الملا محمد الباقر الخاقاني
الشاعر :عباس الشبلاوي
رد مع اقتباس