قصيدة : فرج هالدنيا بيك
للشاعر : كرار حيدر الخفاجي
ليلة 7 رمضان 1436 هـ
: برج الشمالي - جنوب لبنان


فَرَج هالدنيه بيك .. سَلام الله عَليك
▪️▪️▪️▪️▪️
صرت انام و غافيه ابنص عيني دمعه
بانتظارك شمعه تضوي وتطفه شمعه
الندبه كل ليله گمت اقراهْ و اسمعه
الجمعه ست ايّام يلّا اتجيب جمعه
المدامع ترتجيك .. سَلام الله عَليك
▪️▪️▪️▪️▪️
سيّدي أينَ استقرّت بيك الْسنين
ياأرض هاي التقِلّك ياثره و وين
كل فجر أدعِي يَرب و اهدِي ركعتين
بظهور الحجّه إشفِي صدر الْحسين
المناحر تنتخيك .. سَلام الله عَليك
▪️▪️▪️▪️▪️
ابنفسِي من مُغيّبٍ لَمْ يَخلُ مِنّا
ابنفسِي من نازحٍ ما نَزَح عنّا
ابنفسِي أنته امنيَة شائق يَتمنّى
مؤمن اتذكّر و مؤمنه فَحنّا
دِعت أشواگي ليك .. سَلام الله عَليك
▪️▪️▪️▪️▪️
ياعطر حامِي الحمه ونهج البلاغه
ابنفسي من أثيلِ مجدٍ ، الله صاغه
امچانك الفارغ مته ينسد فراغه
يعِزْ أنْ أُجابَ دونك أو أُناغه
مته أسمع حَچيك .. سَلام الله عَليك
▪️▪️▪️▪️▪️
يمته يايوسف الزهره و الصبر فاض
اعيون يعگوبك يَمهدي صارَن ابياض
إنْ چان ما رايد ترِد و الهجُر ما فاض
رِد قميصك ريحتك تشفِيلي الامراض
و إذا تطلب أجيك .. سَلام الله عَليك
▪️▪️▪️▪️▪️
ياعزيز وحتى بين انفاسِي ألگاك
زحمه عايش دنيه يالمهدي بليّاك
مَسّنا و أهلَنا الضر و إجيناك
اتصدّق اعلينه يمهدي روحي تفداك
أنه ابدمّي اشتريك .. سَلام الله عَليك
▪️▪️▪️▪️▪️
يابوصالح ضاگت اعلينه الوسيعه
ونندبك الله ياحامي الشريعه
الوصال اشوكت ملّينه القطيعه
رِد عليك ابفاطمه الزهره الوديعه
الزمانك يامَليك .. سَلام الله عَليك
▪️▪️▪️▪️