قصيدة : مركب مصايبنا رسى
للشاعر : السيد عبد الخالق المحنه
: ليالي استشهاد امير المؤمنين (ع)
: ليلة 23 رمضان 1435 هـ
: حسينية داود العاشور البصرة ابي الخصيب
طور : #سامره_صاحت_بالنجف

مركب مصايبنه رسه .. يلاهي
دعوة يتيم بهالمسه .. يلاهي
يارب الارباب .. رد قالع الباب .. يلاهي
▪️▪️▪️▪️▪️
ربي بالدمعه اليتيم اتلگه عيده
يا يتيم اليفرح خلاف الصميده
و الله وسفه شوفة الغالي بعيده
حيدر يروح و يظل الما اريده
يا ربي خل يرجع علي .. دخيلك
بس هو بالدنيه الي .. دخيلك
و هواي الأسباب .. رد قالع الباب .. يلاهي
▪️▪️▪️▪️▪️
ابقه ادعو يا ألهي بكل مسية
بلكي يرجع لي علي حامي الحميه
من يجي غيره بعد يسأل عليه
ربي من بعد الصميده شلون بيه
منهو اليدك بابي بعد .. يحيدر
و الغالي عن عيني ابتعد .. يحيدر
و الله القلب ذاب .. رد قالع الباب .. يلاهي
▪️▪️▪️▪️▪️
الحاجة من حيدر فلا بيها مذلة
جان يطعمني كبل ما يطعم اهله
من يروح الحيدر بحالي يگله
انتظر عالباب و المدمع اهله
ذلة يبو حسين اصبحت .. حياتي
من سافرت عني انتهت .. حياتي
و عيوني محراب .. رد قالع الباب .. يلاهي
▪️▪️▪️▪️▪️
چان كل ليلة يجيني بأبتسامه
احنه نمنه و هو ليله ما ينامه
ربي يالرديت يوسف بالسلامة
خل يرد حيدر علي الـ هاي اليتامه
يا ربي وين ابا الحسن .. نريده
يحمينه من هذا الزمن .. نريده
يذبحني الغياب .. رد قالع الباب .. يلاهي
▪️▪️▪️▪️▪️
خاطري مكسور و جفوفي ارفعتها
دنيه هاي خلاف حيدر ما ردتها
گبل روحه ليش ما روحي خذتها
دمعتي حره و غربتي استعبدتها
خلاها ليل بلا صبح .. غيابه
كل لحظة يجرحني جرح .. غيابه
للسائل جواب .. رد قالع الباب .. يلاهي
▪️▪️▪️▪️▪️
وي دمع زينب جره دمع المصيبه
احنه كل واحد بجه الفركة حبيبه
ربي يا رحمٰن ابو زينب تجيبه
اني ادري بكربله تبقى غريبه
زينب بعد ذاك الخدر.. سبيه
يا وسفه ياخذها الشمر .. سبيه
و الحادي سلّاب .. رد قالع الباب .. يلاهي
▪️▪️▪️▪️▪️
و اليتيم بكربله محد يحضره
بالحوافر يا وسف ينداس صدره
و اليشاهد ذبحة اهله من يصبره
و الگلب من ينكسر انته التجبره
كل اخوتج راحوا جتل .. يزينب
روحي سبيه اعله الهزل .. يزينب
بدموع العتاب .. رد قالع الباب .. يلاهي
▪️▪️▪️▪️▪️