قصيدة : ينزف مأسي
للشاعر : السيد عبد الخالق المحنه
: ليالي استشهاد امير المؤمنين (ع)
: ليلة 23 رمضان 1433 هـ
: حسينية داود العاشور البصرة ابي الخصيب

ينزف مآسي مو دمع ناظري
يا دهري لا ترحم كسر خاطري
◾️◾️◾️◾️
شايف يدهري من يموت الشمع
طبعه الضوه بس عمره يخلص دمع
يا دهري لو صوت الجرح ينسمع
ناداني يا زينب بعد كابري
◾️◾️◾️◾️◾️
ذاب الحجر لمّن سمع ونتي
ام الحزن اني الدمع سلوتي
خليني وي ليل الحزن راحتي
يا عيني نوحي و للصبح ساهري
◾️◾️◾️◾️◾️
يا دهري ما يشفه الجرح عالجرح
ضد العواصف و انكسر لي جنح
طبع الجبل ما ينحني للسفح
نار ابدليلي و يبتسم ظاهري
◾️◾️◾️◾️◾️
انه الشفت امي سطرها النذل
كسر الضلع يا دهري ما ينحمل
تبقه المدامع للمنيه تهل
يا روحي عالدنيه العفه و اصبري
◾️◾️◾️◾️◾️
و اليوم اشاهد حيدر ابهالوضع
عمري بعد عمره فلا بي نفع
معقولة حماي الحمه ينصرع
مدري اشيصر عاليشطر العامري
◾️◾️◾️◾️◾️
سيف الله هذا و الفتى و الاسد
و البسملة و القل هو الله و احد
هذا العلى متن النبوة صعد
يا دنيه بالهم و المصاب امطري
◾️◾️◾️◾️◾️
هذا الوصل فوق الخيال و عبر
هذا المحامي و القلع و الشطر
هاليوم اشوفه مستعد للسفر
يا روحي وي حامي الحمه سافري
◾️◾️◾️◾️◾️
ساعاته صارت بالتنازل تعد
و اليمشي عني يا دهر ما يرد
وسفه يبو الحملة يضمك لحد
يا هلـ الارض عن دفنته اتعذري
◾️◾️◾️◾️◾️
يا زينب ابأرض الطفوف الألم
صوتج ينادي اهنا يراعي العلم
عينج تشوف حسين صدره انهشم
بالغاضريه بالمصاب ابشري
◾️◾️◾️◾️◾️