يا شريچ العمر
يمحلي العمر
يا وصيتي الضامها
ليوم الگبر
يالمكانك محبس
بنص الضريح
غالي مثل المستحى
مالك سعر
عازلك من بينهم
صوغة عزيز
صوغة أمي الغالية
الما تنشمر
أمي گالتلي الرزق
صاحب حلال
وأنت تعبي وراحتي
ورزق العمر
العنده مثلك
ما يدورله اعله بير
العنده مثلك
سرّه ما يطلع شبر
گالوا أرسم صاحبك
بس باختصار
گلت أرسم باب
بي معنى شكثر
شنهو نفع البيت
إذا ما حطله باب
الباب صاحب زين
بلسانه الستر
وما رسمتك وردة
خليتك چبير
الوردة من تنرسم
ما بيها عطر
الما يعرفك.. ما يثمنك
لا.. قديم
الما يعرفك
ماله مگعاد بصدر
گالوا اعله أشكالها
تحط الطيور
وانا مو من ناسنا
التشوي الصگر
انا اعرف الزين
يمشيله ويَ زين
وانت وكت الگهوة
لا ما تنعبر
انت يا تچايتي
اليمها أستراح
انت يا نسمة برد
وكت الفجر
انت يا ربحي
الربحته من السنين
انت يا جنحي
القوي الما ينكسر
حزام ظهري
الما رخى يم الغريب
ولا رخى بشدة
ولا دوّر عذر
هواي ترسوني گبل
ابشر.. واخوي
وانت تارس روحي
وگفات شكثر
مَ اضّم راسك
إذا مر بيه بيل
توگف گبالي
مثل شمس الظهر
العنده صاحب مثلك
من الله شيريد
وانت نعمة
وتستحق سجدة شِكر