ما عِندي غـالـي .. يبچي اعلى حـالـي
***********************
صَبر اليتانون .. مايگضي بالكوّن
يَـمراية وتعيش بس يم العِيون
يـوم بألف عام .. ياثِگل الأيام
گمت أشتري النوم من عَين الينام
خوف وجفه وظلمة وحرب
ومضيعة من شوف وگلب
هم سامع ابــتايه گبل
ينشدله تايه ع الدَرّب!
ظلّ بس خَــيالي ... ما عِندي غالي
***********************
طيفك ع الرسوم .. كل مُغرب ايحوم
گوه الحلم جاي بس مايجي النوم
يا كُبرّ البيوت .. بس چنها تابوت
چِنت أشتري النوم بس أشتري الموت
نار ويطفيني الدمــع
يتغطه بدموعه الشمــع
مادامك بعز النَفـس
چا يا نَفس لا تنگطع
ظَلّ كِلشي خـالي ... ما عِندي غالي
***********************
حد ساعتك هاي ... طف كربلا وياي
مو بالشمس غاد يچوينه الفيـاي
شمس امن السيوف ... متناقض الخوف
اتمنى الاگيك واتمنى ما اشوّف
اتمنى ضعنك ماوصل
واتمنى نرجع مانظل
واتمنى ماصارت صِدّگ
واتمنى الاتمنـى حِصلّ
وحشة اللـيالي ... ما عِندي غالي
***********************
طايح صحت ليش .. وتگرّب الجِيش
عَكس الگلب صير بس توگف انعيش
غاد انتَ موجود .. واهنانه ممـدود
ماشفنه مذبوح كلما گِضه ايـزود
يَمطَشر ابطول وعِرض
واركض واشوفك ماتفض
حسبالي ما اركض لإن
لاگيتك ابكل الرَكض
يـَ اهلي وحلالـي ... ما عِندي غالي
***********************
منك منو يجيب .. يَمجمّل الشِيب
والينجرح بيك مالازم ايطيب
گد ما بالأنفاس .. بالرية تنباس
انتَ أكثر ابعيد بس أقرب الناس
ضميتك دموع ونهر
وتعثرت خوف وحَذر
من تنضم ابغيمه الشَمس
يطلع ضوها امن الظهر
يَـ حِسينـي تـالي ... ما عِندي غالي
***********************
كلمات الشاعر المُبدع : حَمزة الحِسناوي
تــدوين : zhralobidi
MP3
رد مع اقتباس
المشاركة الأصلية كتبت بواسطة صفاء العامري
