……الك حسبه ..…..

من تدير الوجه صدگ حيل اشيط..
ومن اگومن صرت الا.. آني انتچي..

دير وجهك تره ايگطعلي نيط..
وتغرگ اعيوني ابكثر دمع البچي..

انه عندي احساب الك حسبة گليط..
موش ياهو الچان ونعبره ابحچي..

ريت يمي اتشوف حالي من النحيط..
يالي خليتك مسد بيك ارتچي..

الناس تدري معذربه اتحب النغيط..
وعدها غايه ورايده اتشل مضحچي..

وآنه مو ذاك الذي ابحچيه يعيط..
ولاني فلاح ابسلف لاسفرچي..

آنه اصير احزام للاهواه نشيط..
وآنه سچه امعتبره ياسالچي..

وآنه ماي امصلصل ومابيه خبيط..
ومن تعاشرني اتعرف كل مدبچي..

آنه بصحابي تراني الگط لگيط..
وآنه فنجان اويونس الگهوچي..

آنه موخنثة چعب وي السفيط..
والله صول امرصرص والچي لچي..

آنه ما اطلب اخز من الربيط..
من اكض عفنونها اتچي تچي..

آنه ذاك الصوت صافي من الشحيط
ومن ارافج موش رفجة سوگچي

ب..ق..عبدالامير البديري