جولة في شارع الأشراف.. 5 أماكن فيها ريحة التاريخ وروحانيات الزمن الجميل
آل البيت أماكن تاريخية السياحة الدينية السيدة نفيسة القاهرة الفاطمية المزارات الإسلامية تاريخ مصر شارع الأشراف ضريح عمارة إسلامية
العمارة الإسلامية من الحاجات اللي بنفتخر بيها وكل ما نمشي في منطقة أثرية بنحس إننا رجعنا لورا في الزمن وشارع الأشراف من الشوارع اللي فيها روحانيات وعبق تاريخي مش طبيعي. الشارع ده بيبدأ من ميدان السيدة نفيسة وبيوصّل لغاية مسجد أحمد بن طولون في السيدة زينب. في السطور الجاية هنعرفكم على 5 مزارات تاريخية تقدروا تزوروها في شارع الأشراف.
1. السيدة نفيسة
المسجد اللي موجود دلوقتي اتبنى على إيد الخديوي عباس حلمي التاني سنة 1896، لكن أصل المكان بيرجع لسنة 825 ميلادية وقت ما بناه الوالي العباسي عبيد الله بن السري. القبة اتحطت عليه في العصر الفاطمي سنة 1089 وجددها الخليفة الحافظ لدين الله سنة 1138. المدفن اللي جوه اتبنى على شكله الحالي واتقسم مدخلين: واحد للرجالة والتاني للسيدات، والذي كان بأمر من الأمير عبد الرحمن كتخدا سنة 1760. المكان اتجدد كذا مرة، وآخر تجديد حصل وافتتاحه كان سنة 2025.
2. السيدة رقية
المسجد تم بناءه على اسم السيدة رقية وبالرغم من إن في خلاف حوالين نسبها، هل هي بنت الإمام علي بن أبي طالب ولا بنت الإمام علي الرضا بس الأكيد إنها من آل البيت. المسجد قريب من بوابة السيدة نفيسة وكان في الأصل مسجد صغير اسمه “الأندلس”. لحد الان ولا يوجد تأكيد إنها مدفونة هناك، لكنه ضريح مهم تم بناءه سنة 1154 ميلادية، وتم تجديده سنة 2022 واتفتح من جديد سنة 2023. المسجد فيه مكتبة، حضانة، فصول تقوية، وقاعات مناسبات، غير المصلى للرجالة والسيدات.
3. قبة شجرة الدر
القبة دي أنشأتها زوجة السلطان الأيوبي نجم الدين أيوب سنة 1250 ميلادية، واتسمت على اسمها. القبة قريبة من مسجد السيدة رقية، وهي على شكل مربع، في جدارها الجنوبي المحراب، وليها 3 مداخل. في نص الأرضية فيه تركيبة خشب حديثة فوق مدفن شجرة الدر.
4. السيدة سكينة
أول واحدة من آل البيت تدخل مصر كانت السيدة سكينة، واسمها الحقيقي “آمنة بنت الحسين”. اتبنى ليها ضريح بسيط، لكن سنة 1760، الأمير عبد الرحمن كتخدا وسّع الضريح وبنى مسجد وحط مقصورة نحاس عليه. سنة 1905، الخديوي عباس حلمي التاني أمر بتجديده، وبقى ليه 3 مداخل و6 أعمدة رخام، ومنبر خشب، وتابوت جواه جوه مقصورة نحاس كبيرة.
5. ابن سيرين
ضريح مفسر الأحلام الشهير “ابن سيرين” موجود برضو في شارع الأشراف. اسمه الحقيقي “أبو بكر محمد البصري”، واتلقب بابن سيرين علشان كان بيحب أمه جدًا، وكانت أخت مارية القبطية زوجة النبي عليه الصلاة والسلام. الضريح بسيط مكون من دورين، وفيه شباكين تقدر تبص منهم لو حبيت تشوف الضريح من جوه.
رد مع اقتباس
